Stórstjörnurnar Lady Gaga og Bradley Cooper áttu kraftmikinn flutning á laginu Shallow úr kvikmyndinni A Star Is Born á Óskarsverðlaunahátíðinni í gær. Eins og margir áttu von á hlaut síðan Shallow verðlaun fyrir besta frumsamda lag úr kvikmynd og hlaut Lafðin þar af leiðandi sína fyrstu Óskarsstyttu.
Þegar söngkonan steig á sviðið tók við einlæg ræða þar sem öruggt er að fullyrða að hafi komið nokkur tár. Í ræðunni hvatti hún alla til dáða og taldi það brýnt að allir elti drauma sína, sama hversu erfitt það er eða langsótt markmiðið getur verið. „Ég vann hart í langan tíma og þetta snýst ekki um að vinna, heldur það að gefast ekki upp. Ef þú átt þér draum, berstu fyrir honum,“ sagði Gaga.
„Þetta snýst ekki um hversu oft þér er hafnað, þetta snýst um hversu oft þú stendur upp og ert hugrökk og heldur áfram.“
Lafðin gleymdi að sjálfsögðu ekki að þakka samstarfsmanni sínum og helsta stuðningsmanni, honum Bradley Cooper, en hún sagði: „Bradley, það er ekki ein manneskja á plánetunni sem að hefði getað sungið þetta lag með mér nema þú, takk fyrir að trúa á okkur.“
Sjá einnig: Flutningur Lady Gaga og Bradley Cooper á Óskarnum vekur athygli:
„Meira augnsamband en ég hef nokkurn tímann haldið“
Ræðuna má sjá í heild sinni að neðan.
