Það kom einhverjum í opna skjöldu þegar útvarpsmanninum Hjörvari Hafliðasyni var sagt upp á Sýn á dögunum, en hann hefur bæði farið á kostum í útvarpsþættinum Brennslunni sem og í fótboltaumfjöllun á stöðinni. Því greip DV tækifærið til að spá fyrir hinum hæfileikaríka Hjörvari og minnir lesendur enn fremur á að þeir geti sjálfir dregið sér tarotspil á dv.is.
Fyrsta spilið sem kemur upp í tarotlestri fyrir Hjörvar er Turninn. Það merkir að stolt Hjörvars hefur verið sært nýverið, enda alltaf erfitt að lenda í niðurskurði og uppsögnum. Líðan Hjörvars er ekki í fullkomnu jafnvægi eftir uppsögnina en hann er minntur á að sá óróleiki sem einkennir hversdaginn táknar breytingar sem verða til hins betra. Stundum er nauðsynlegt að ganga yfir erfiða hjalla til að komast að sólinni og eru þetta án efa óhjákvæmilegar umbreytingar á högum Hjálmars. Hins vegar er manneskja sem réttir fram hjálparhönd og býður Hjörvari einstakt tækifæri sem kemur honum þægilega á óvart.
Næsta spil er 7 bikarar, en það er á borðinu til að brýna fyrir Hjörvari að hann megi ekki gleyma sér í draumalandinu, þótt hann sé hugmyndasmiður mikill. Hjörvar ber miklar væntingar til lífsins en hann verður að ákveða hvað hann vill gera á þessum tímamótum. Hann þarf að greina á milli hvað sé raunsætt að koma í verk og hvað séu eintómar skýjaborgir. Hjörvar þarf að ígrunda vel hver næstu skref verða og spyrja sig hvað færi honum virkilega hamingju.
Þá mætir Stafadrottningin á svæðið sem táknar lífsförunaut Hjörvars, Heiðrúnu Lind Marteinsdóttur, framkvæmdastjóra Samtaka fyrirtækja í sjávarútvegi. Heiðrún er mikil félagsvera og hefur í nægu að snúast í vinnunni. Hún býr yfir þeim ótrúlega hæfileika að geta beina orkunni í marga hluti í einu og nær að halda góðu jafnvægi á vinnu og einkalífi. Hún er sem kletturinn hans Hjörvars. Hún er ástrík og trygg, en einnig afar metnaðarfull viðskiptakona sem á eftir að stýra Hjörvari í átt að tækifærum sem eru best fyrir hann. Hjörvar er mikill peningamaður en það er Heiðrún líka og ná þau í sameiningu að búa til stórkostlegt verkefni sem kemur þeim á enn grænni grein.