Shay Mitchell opnar sig um fósturmissi í nýju YouTube myndbandi.
Pretty Little Liars leikkonan er komin sex mánuði á leið með sitt fyrsta barn. Hún heldur úti mjög vinsælli YouTube rás og deildi myndbandi frá trylltustu kynjaopinberun sem við höfum séð.
Í byrjun árs 2019 deildi hún með fylgjendum sínum að hún hafði misst fóstur. Í skilaboðum til fylgjenda sinna skrifaði hún:
„Stuðningurinn og ástin sem svo mörg ykkar sýna mér hjálpar mér á mínum erfiðustu dögum, einn þeirra var dagurinn sem ég missti fóstur og missti barn drauma minna.“
Sex mánuðum seinna, í lok júní 2019, tilkynnti Shay að hún væri ólétt. Nú opnar hún sig um meðgönguna og einnig fósturmissinn, í nýrri YouTube-seríu, „Almost Ready“.
Fyrsti þátturinn er kominn á YouTube og heitir „Að halda leyndarmáli.“ Í þættinum talar Shay um samband sitt með Matte Babel.
„Við byrjuðum saman í rólegheitum fyrir þremur árum. Við erum bestu vinir núna,“ segir Shay.
Eins og fyrr segir er Shay komin sex mánuði á leið með sitt fyrsta barn og tilkynnti það fyrir stuttu. Hún segir hver ástæðan var á bakvið biðina.
„Ég ákvað að bíða með að tilkynna vegna þess sem hafði gerst áður. Það gekk ekki eins og ég vonaðist eftir, og það var rosalega erfitt,“ segir Shay.
„Fyrsta sinn sem ég var ólétt var í fyrra. Við Matt plönuðum það ekki, það bara gerðist og við vorum virkilega spennt. Ég var komin um 14 vikur á leið og á þeim tíma þá hafði ég ekki hugmynd um tölfræðina á bakvið fósturmissi. Þegar það gerðist þá kom það mér algjörlega í opna skjöldu,“ segir Shay og brotnar niður.
Hún segist enn eiga sónarmyndirnar af fóstrinu og myndefni frá læknisheimsóknum.
„Þetta er skrýtið því ég hef ekki skoðað þær, augljóslega. En það er ekki eins og ég hef gleymt að þetta gerðist, auðvitað er ég ótrúlega hamingjusöm núna en ég syrgi enn það sem ég missti.“
Horfðu á þátt Shay hér að neðan.