Flíkurnar frá hátískufyrirtækinu Gucci eru ekki þær ódýrustu sem hægt er að fá. Vörur fyrirtækisins eru þó oftar en ekki mjög vandaðar og endast almennt betur en flíkur úr ódýrari verslunum.
Nýlega kynnti Gucci til sögunnar nýjan galla, jakka og buxur, úr nyloni. Galinn er litríkur; blár, grænn, rauður og fjólublár og minnir um margt á galla sem voru í tísku á níunda og tíunda áratug liðinnar aldar. Á Twitter hefur skapast fjörug umræða um þetta.
Þannig hafa einhverjir borið hann saman við einkennisklæðnað Vicky Pollard úr þáttunum Little Britain. Ólíklegt þykir þó að Pollard hafi greitt jafn mikið fyrir sinn galla og Gucci vill fá fyrir sinn. Verðmiðinn á jogginggallanum er býsna hár, eða 1.800 pund. Það jafngildir 285 þúsund krónum.
