Ástralska ljósmóðirin og áhrifavaldurinn Hannah Polites hefur svo sannarlega slegið í gegn á Instagram með boðskap sínum eftir fæðingu. Þessi 28 ára gamla kona eignaðist soninn Arlo fyrir stuttu og birti síðan mynd af sér á Instagram þar sem hún sýnir líkamann sólarhring eftir fæðingu.
Hannah er með 1,3 milljónir fylgjenda en við hliðina á myndinni sem sýnir líkamann 24 tímum eftir fæðingu er mynd sem var tekin stuttu fyrir fæðinguna.
„Mig langar að vera eins hreinskilin og mögulegt er og deila vegferð minni eftir barnsburð nákvæmlega eins og hún er,“ skrifar Hannah við myndirnar tvær og heldur áfram.
„Ég var þreytt, föl og svolítið aum en ég var svo stolt af því sem ég afrekaði deginum áður. Mannslíkaminn er svo ótrúlegur og ég er svo þakklát að minn líkami gat látið drenginn minn vaxa, fætt hann og nært hann.“
Þá hefur Hannah hlotið mikið lof fyrir að ætla að einbeita sér algjörlega að fjölskyldunni þessar fyrstu vikur eftir barnsburð.
„Ég ætla ekki að flýta mér að komast aftur í fyrra horf og ég ætla að einblína á fjölskyldu mína og nýja barnið. Ég ætla ekki að æfa í að minnsta kosti sex vikur.“
Þá segir hún frá því að dóttir hennar Evaliah sé búin að spyrja af hverju nafli móður sinnar sé svona skrýtinn og af hverju húðin á maganum sé svona mjúk.
„Hún veit að það er af því að líkami minn skapaði fallegt líf og það er gjörsamlega magnað.“
