35 ára gamall Breti átti ekki sjö dagana sæla þegar hann datt af vespu sinni. Maðurinn slasaðist ekki alvarlega en fékk mar á spöngina, svæðið á milli getnaðarlimsins og endaþarms, með þeim afleiðingum að hann fékk standpínu í níu daga.
Maðurinn fór ekki á spítala strax eftir slysið en ákvað að fara þegar að standpínan hafði varað í níu daga. Sagt er frá þessu óvenjulega atviki í skýrslu á vef Case Reports in Urology.
Í skýrslunni segir að maðurinn hafi ekki verið þjáður þessa níu daga en þó átt erfitt með gang. Vanalega endast standpínur of lengi því blóð kemst ekki úr getnaðarlimnum vegna stíflaðra æða. Í tilviki mannsins með níu daga standpínuna var þó þannig í pottinn búið að blóð flæddi stöðugt í getnaðarliminn, með fyrrgreindum afleiðingum.
Vanalega leysist svona vandamál af sjálfu sér en Bretinn ákvað að biðja lækna um að grípa inn í, sem þeir og gerðu. Læknar notuðu pípu til að sjá hvaða æðar væru að fóðra standpínuna með blóði og bjuggu til litla blóðtappa til að maðurinn gæti haldið áfram með líf sitt.