Fanney Dóra Veigarsdóttir, ein af stærstu samfélagsmiðlastjörnum landsins, hefur glímt við alvarleg mígrenisköst frá fimmtán ára aldri. Hún var á mörkum þess að gefast upp og reyndi allt til að sigrast á vandamálinu.

„Maður verður svo kvíðinn þegar maður fær reglulega mígreni, Allir sem hafa upplifað þetta vita hvað það er ömurlegt að vera með þetta og maður verður á endanum tilbúinn að gera nánast hvað sem er,“ segir Fanney Dóra í samtali við Bleikt. „Þetta getur gerst hvenær sem er. Ég hef oft þurft að stöðva bílinn á vegkantinum því ég get ekki keyrt með þessa verki, eða þurft bara að æla í bílnum því ég var í miðri traffík og gat ekki stoppað.“

Fanney segist hafa farið eftir öllum reglum bókarinnar í tengslum við lausnir. Hún breytti mataræðinu og sleppti meðal annars kjöti, athugaði einnig hvort hún þyrfti á gleraugum að halda og fór í gegnum ófáar TREO-töflur, en ástandið skánaði ekkert. Þá ákvað Fanney að prófa svonefnda daith-lokka, eða mígrenislokka, en samfélagsmiðlastjarnan var allt annað en bjartsýn á þá lausn fyrir fram.

„Það veit enginn hvernig mígreni gerast eða hvernig er hægt að losna við svoleiðis. Það virkar svo fáránlegt að fá sér gat í eyrað og að þá eigi allt að hverfa. Næsta skrefið hefði verið að fara í nálastungur, en mér fannst það alveg jafngrillað og dýrt ofan á það. Ég veit að margir fara í svoleiðis og það virkar fyrir fólk en mér fannst sú lausn virka pínu steikt,“ segir Fanney.

„Sumir eru með mígreni vinstra megin í höfði en ég var með á hægri hlið, þannig að ég fékk mér gat í hægra eyrað, en ég var auðvitað voða efins um þetta fyrirfram enda engar rannsóknir sem sýna að svona aðferðir séu réttar. Mér þótti það vera svo lítið mál að fá gat í eyrað en ég hugsaði að það væri auðvitað geggjað ef það myndi hjálpa. Með þessum daith-eyrnarlokkum einhver trigger-punktur þarna en ég trúði þessu ekki, en nú hef ég ekki fengið mígreni síðan og það er komið ár,“ segir Fanney.

„Ég hélt samt áfram að fá sjóntruflanirnar annað slagið en síðan fór ég í heilsunudd hjá Ingibjörgu Ýr og þá fóru truflanirnar alveg.“