Þeir sem eru einhleypir hafa margir hverjir nýtt sér smáforritið Tinder til að komast á stefnumót og kynnast nýju fólki. Nú ríður hins vegar ný, hrollvekjandi tískubylgja yfir Tinder sem færist einnig yfir á Instagram. Þessi nýja bylgja heitir einfaldlega Tindstagramming, en orðið er sambland af Tinder og Instagramming.
Tindstagramming hljómar eins og skemmtilegt orð en hefur vissulega skuggahliðar. Er þetta í raun fallegt orð yfir eltihrelli á samfélagsmiðlum. Tindstagramming felst í því að þegar að manneskja fær tilkynningu um einhverja aðra manneskju á Tinder, hugsanlegan vonbiðil, en ákveður að hafna henni með því að færa fingurinn ákveðið til vinstri. Þá tekur manneskjan, sem er hafnað, upp á því að leita uppi hina manneskjuna á Instagram og hrellir hana í einkaskilaboðum – eða reynir það allavega.
„Þær hundsa þá staðreynd að þú hefur klárlega ekki áhuga á að tala við þær, í ljósi þess að þið pössuðuð ekki saman á stefnumótaforritinu,“ segir Samantha Burns, rithöfundur og stefnumótaþjálfi, í samtali við Women‘s Health.
Þó að þetta athæfi sé kallað Tindstagramming þá á þetta einnig við önnur stefnumótaforrit víðs vegar um heiminn, svo sem OkCupid, Bumble og Hinge.
„Þetta er líkt og brotið sé á þér,“ segir Samantha. „Þú skráðir þig í stefnumótaforrit til að fara á stefnumót með fólki sem þú passar saman við og þú skráðir þig líklegast ekki á Instagram til að vera hrelltur af einhverjum bjánum, allra síst af þeim sem þú ert búin/n að afskrifa á Tinder.“
Samantha segir þá sem Tindstagramma vera með sært stolt og noti þessa leið því þeir telji sér trú um að viðkomandi sem hafnaði þeim hafi gert það óvart.
„Þeir vona að þessi óhefðbundna leið til að ná athygli muni auka líkurnar,“ segir hún. „Stundum er ásetningur þeirra saklaus og þessir aðilar vilja bara kynnast þér því síðan þín á stefnumótaforritinu var svo frábær. Hins vegar er þetta oft bara hrollvekjandi tilraun til að senda kynferðisleg skilaboð.“