Tískudrottningin Ása Ninna Pétursdóttir byrjaði nýverið með undirvefinn Makamál á Vísi, en á vefnum fjallar hún um allt sem tengist ástinni, tilhugalífinu og stefnumótamenningu.
Nánast um leið og vefurinn fór í loftið tilkynnti Ása Ninna að hún væri gengin út, en sá heppni heitir Árni Bragi Hjaltason og er verkefnastjóri og plötusnúður.
Ása Ninna var lengi vel gift Guðmundi Hallgrímssyni og ráku þau saman verslunina GK. Ása sagði í Íslandi í dag fyrir stuttu að hugmyndin að fyrrnefndum Makamálum hefði byrjað að gerjast innra með henni þegar hún skildi og varð einhleyp í fyrsta sinn í mörg ár.
„Þá fór maður allt í einu inn á svona nýjan vígvöll þar sem maður kunni ekki reglurnar sem var mjög kómískt og fyndið þá þróaðist þessi hugmynd. Þetta byrjaði sem skemmtisketsa hugmynd en svo langaði mig að taka þetta lengra og taka viðtöl við fólk og sjá hvernig fólk hagaði sér á þessum nýja vígvelli rafrænnar rómantíkur,“ sagði Ása Ninna, sem svífur nú á vængjum ástarinnar.
