Körfuboltamaðurinn Lamar Odom og raunveruleikastjarnan Khloé Kardashian skildu fyrir rúmlega fimm árum eftir stormasamt fjögurra ára hjónaband. Í æviminningum sínum, Darkness to Light, segist Lamar enn sjá eftir því að hafa haldið framhjá þáverandi eiginkonu sinni.
„Ég vildi óska að ég hefði getað verið meiri maður,“ segir Lamar um framhjáhaldið í viðtali við People og bætir hann við að hann hafi einnig falið kókaínfíkn sína fyrir Khloé. „Þetta angrar mig enn í dag. En eftirsjá er eitthvað sem maður verður að læra að lifa með.“
Lamar og Khloé gengu í það heilaga árið 2009, aðeins mánuði eftir að þau kynntust. Lamar segir að í fyrstu hafi sambandið gengið eins og í sögu.
„Um tíma var samband mitt og hennar dans á rósum og ég hef aldrei verið hamingjusamar,“ skrifar hann í Darkness to Light. „En við vorum eitt af frægustu pörunum í Hollywood og við þénuðum meiri peninga saman en við höfðum gert í sitthvoru lagi.“
Lamar segist hafa verið trúr eiginkonu sinni í fyrstu en síðan byrjað að halda framhjá.
„Ég gat ekki höndlað banvænan kokteil sviðsljóssins, fíknar, hnignandi ferils og framhjáhalds,“ skrifar hann. „Og minnsti ég á vænisýki, kvíða, þunglyndi… Ég gat ekki haldið typpinu í buxunum eða kókaíninu úr nefinu. Dópistar eru mjög hæfir í að fela fíknina. Ég fór í vörn og Khloé hætti bara að tala um þetta.“
Khloé fékk loks að vita um framhjáhaldið og lygarnar og hjónin skildu, en hún sneri ekki baki við körfuboltamanninum. Lamar lenti á sjúkrahúsi árið 2015 þegar hann tók of stóran skammt af eiturlyfjum og þá stóð Khloé þétt við bakið á honum.
„Ég man að ég vaknaði og hún sýndi mér myndir af móður minni,“ segir Lamar í samtali við People, en móðir hans, Cathy, lést úr krabbameini þegar hann var aðeins tólf ára gamall. „Ég var hissa yfir því hve fljótt hún sýndi mér hollustu. Ást hennar til mín hlýtur að hafa verið skilyrðislaus.“
Lamar er edrú í dag en segist enn kljást við djöflana innra með sér. Hann vonar að hann og Khloé haldi áfram að vera vinir.
„Ég sakna fjölskyldunnar og ég vona að við náum aftur saman einn daginn.“
Endurminningar Lamars, Darkness to Light, koma út þann 28. maí næstkomandi.