Kvikmyndaframleiðandinn og leikstjórinn Trevor Engelson gekk að eiga unnustu sína, Tracey Kurland í Montecito í Kaliforníu á laugardaginn. Trevor er fyrrverandi eiginmaður Meghan Markle, hertogynjunnar af Sussex, en Tracey er dóttir Stanford Kurland, viðskiptajöfursins sem græddi milljónir á vafasömum lánum sem leiddu til hrunsins á fasteignamarkaði í Bandaríkjunum árið 2008.
Daily Mail birtir myndir úr brúðkaupinu sem var glæsilegt í alla staði, en Trevor bað Tracey í júní í fyrra. Það var þó talsvert frábrugðið brúðkaupi hans og Meghan. Þau giftu sig í Ocho Rios í Jamaíka og söfnuðust rúmlega hundrað manns saman í veislu sem varði í fjóra daga.
Trevor og Meghan byrjuðu saman árið 2004 og gengu í það heilaga í september árið 2011. Þau skildu átján mánuðum síðar. Meghan játaðist svo Harry Bretaprins í fyrra og nýverið eignuðust þau sitt fyrsta barn.