„Ég var alltaf að lenda uppi á spítala í verkjaköstum þar sem ég var nánast svæfð í hvert skipti,“ segir Erla Kolbrún Óskarsdóttir, sem hefur síðustu ár opnað sig um baráttu sína eftir læknamistök. Hún mætti í Bítið á Bylgjunni í morgun til að fara yfir stöðu sína í dag.
Erla Kolbrún sagði sögðu sína í DV í september á síðasta ári. Hún gekkst undir aðgerð árið 2012 við endaþarmssigi sem hún hlaut við að fæða dætur sínar. Aðgerðin var framkvæmd á Akranesi og þegar Erla vaknaði af henni var henni ljóst að ekki var allt með felldu. Landlæknir úrskurðaði að Erla hefði orðið þolandi vanrækslu af hálfu læknisins sem framkvæmdi aðgerðina en yfirlæknir kvennadeildar Landspítalans hefur ályktað að hér hafi læknamistök átt sér stað. Mistökin eru í sem stystu máli fólgin í því að læknirinn saumaði saman á röngum stað og lamaði við það viðkvæmar taugar.
„Ég átti að fara í beisik aðgerð við endaþarmssigi sem kom í kjölfar meðgöngu og fæðingu. Í kjölfarið á henni urðu einhver mistök hjá lækninum og afleiðingar voru þannig að verkirnir voru óbærilegir. Það tóku við sex ár þar sem ég var kvalin upp á hvern einasta dag og gat með engu móti gert neitt. Gat ekkert sinnt börnunum mínum, ég gat ekki stundað nám, gat ekki stundað vinnuna. Það var allt tekið frá mér,“ segir Erla Kolbrún í viðtalinu í Bítinu í morgun.
Fyrrnefnt viðtal við Erlu Kolbrúnu í DV í fyrra var vegna fjársöfnunar sem var hafin til að koma henni í stofnfrumumeðferð í Bandaríkjunum. Sú söfnun heppnaðist mjög vel og Erla Kolbrún komst út, í meðferð sem kostar með öllu tvær milljónir.
„Ég verð öllum ævinlega þakklát fyrir alla þá samkennd og innilega þakka fyrir alla þessa hjálp sem ég fékk í sambandi við söfnunina,“ segir Erla Kolbrún í Bítinu. Hún fór til Bandaríkjanna í nóvember í fyrra ásamt eiginmanni sínum og dætrum þeirra tveimur. Henni fannst mikilvægt að dæturnar sæu að móðir sín væri að leita sér hjálpar og fengju að upplifa ferlið frá A til Ö með móður sinni. Erla Kolbrún segir að meðferðin hafi verið sárasukafull, en nokkrum vikum eftir hana, nánar tiltekið þann 15. desember, byrjaði hún að finna mun á verkjunum.
„Ég finn það mikinn mun að ég byrjaði að geta gert hluti, beisik hluti eins og að taka úr uppþvottavélinni,“ segir hún. „Það hefur komið bakslag og það er bara eðlilegt. Ég hef fengið verki örlítið til baka en ég er svo langt frá því að vera eins og ég var áður. Læknirinn úti sagði að ég þyrfti líklegast að fara aftur til að fá enn betri bata,“ segir Erla Kolbrún. Hún hefur fundið íslenskan lækni sem hefur til dæmis starfað í Bandaríkjunum en er nýfluttur aftur heim. Hún er komin undir hans verndarvæng og telur hann möguleika á að framkvæma aðra stofnfrumumeðferð hér heima, sem myndi þýða talsvert minni kostnað fyrir Erlu Kolbrúnu og fjölskyldu hennar.
„Hann sérhæfir sig í verkjameðferðum og er algjörlega guðs gjöf.“
Viðtalið í heild sinni má hlusta á hér fyrir neðan: