Það kom mörgum í opna skjöldu um páskana þegar fregnir um skilnað söngkonunnar Adele og eiginmanns hennar, Simon Konecki, bárust, en blaðafulltrúi Adele staðfesti fréttirnar á föstudaginn langa.
Nú segir heimildarmaður Us Weekly að þau hafi verið löngu hætt saman.
„Þau hættu saman fyrir átta eða níu mánuðum,“ segir heimildarmaðurinn sem kýs að njóta nafnleyndar.
Adele og Simon eiga soninn Angelo, sex ára, saman og varði hjónabandið í tvö ár. Annar heimildarmaður Us Weekly, sem er einnig nafnlaus, segir ástarblossann einfaldlega hafa slokknað.
„Sambandið þróaðist og þau urðu meiri vinir en elskhugar,“ segir hann. „Þau gerðu sér grein fyrir að rómantíska ástin var ekki til staðar. Þau eru vonsvikin en þetta virkaði bara ekki.“