Það vill oft verða þannig þegar fólk byrjar í líkamsræktarátaki þá setji það sér of háleit markmið. Í stað þess að ætla fara alla daga í ræktina settu þá niður nokkra fasta daga fyrstu vikurnar sem þú ætlar að mæta í ræktina. Ef þú ferð oftar en þú ætlaðir þér þá er það bara stór plús. Það er líklegra að þú getir haldið þig við markmið sem er ekki of háleitt og minni líkur á að þú hættir.
Það getur verið áhrifaríkt að halda dagbók. Skrifa niður hvað þú gerir á hverjum degi, hvað þú borðar og hvort þú æfir eða ekki. Ef þig vantar hvatningu og stuðning þá getur líka verið sniðugt að fá vini þína til að fylgjast með. Til dæmis með því að stofna lítinn hóp á Facebook fyrir þá sem eru í sömu sporum og þannig getur fólk innan hópsins spjallað sín á milli um átakið.
Stundum langar mann bara alls ekki í ræktina. Ekki láta undan letinni heldur farðu af stað. Þótt þig langi ekki neitt þá áttu eftir að verða ánægð/ur að því loknu. Þótt þú sért ekki nema hálfan tíma þá fórstu samt og það er líka líklegra að þú farir aftur daginn eftir.
Það þýðir ekkert annað en að temja sér jákvæðni. Þú kemst ekkert áfram á neikvæðninni.
Það skiptir máli að gera hluti sem þér finnst skemmtilegir. Ef þú átt börn, farðu þá með þau í gönguferðir og hjólaferðir. Farðu frekar fótgangandi út í búð heldur en að keyra. Taktu stigann í stað lyftunnar. Það eru líka litlu hlutirnir sem skipta máli.