Leikkonan Jennie Garth deildi saklausri mynd af sér og Tori Spelling á Instagram, en þær stöllur léku bestu vinkonur í sjónvarpsþáttunum Beverly Hills 90210. Einhverjir fylgjendur Jennie fundu sig samt sem áður knúna til að skrifa athugasemdir um útlit stjörnunnar og finnst einhverjum hún hafa látið breyta andliti sínu of mikið.
„Ó, Jennie. Þú ert falleg og þarft ekki allt þetta Botox! Þú ert því miður óþekkjanleg hér!“ skrifaði einn notandi. Jennie ákvað að svara og skrifaði einfaldlega: „Takk?“
Annar fylgjandi sagði að Jennie væri gervileg og þá svaraði stjarnan: „Nei, ég er mennsk.“
Svo var það þriðji fylgjandinn sem spurði einfaldlega: „Jemundur, hvað gerðist fyrir andlitið þitt?“ Þá svaraði Jennie: „Þú ert frábær.“
Jennie lætur greinilega ekki vaða yfir sig á samfélagsmiðlum en aðdáendur Beverly Hills-þáttanna eiga eftir að sjá miklu meira af henni í sumar þegar að serían gengur í endurnýjun lífdaga á sjónvarpsstöðinni FOX.
