Kona að nafni Jami Ledbetter, 42 ára, hefur komist í heimsfréttirnar síðustu daga, en líklegast ekki út af ástæðum sem hún hefði fremur viljað. Þannig er mál með vexti að Jami fæddist án augabrúna og var himinlifandi þegar að dætur hennar gáfu henni gjafakort í næstum varanlegt augnbrúnatattú, eða „microblading“. Sagt er frá þessu á vef WDAF.
Þeir sem ekki vita hvað „microblading“ er þá er um að ræða form af húðflúri sem er næstum því varanlegt, en þeir sem framkvæma þennan verknað nota lítinn hníf eða nál til að apa eftir hárum í augabrúnum.
Jami pantaði tíma en var hins vegar ekki parsátt þegar að meðferðinni var lokið. Þá blasti þessi mynd við henni í spegli:
Brúnirnar voru það dökkar að Jami gat ekki falið þær með farða og í samtali við WDAF segir hún að sjálfstraustið hafi verið í molum út af þessu.
„Ég var miður mín. Ég var meira að segja að hitta karlmann og hann hætti að hitta mig á þessum tímapunkti,“ segir Jamie.
Hún fann aðra manneskju sem lofaði að geta lagað gömlu brúnirnar. Það gekk hins vegar ekki heldur upp og endaði Jami með fjórar augabrúnir. Algjör hörmung. Nú er hún hins vegar búin að setja sig í samband við húðflúrlistamanninn Kara Gutierrez sem ætlar að laga augabrúnirnar hennar.
„Ég þurfti að hafa mig alla við svo ég myndi ekki fara að hágráta því þetta er það versta sem ég hef séð,“ segir Kara. Nú tekur við löng meðferð til að laga augabrúnirnar og verður heildarkostnaður líklega um þúsund dollarar, eða tæplega 120 þúsund krónur.
„Ef ég hefði vitað að þetta myndi enda svona hefði ég örugglega aldrei gert þetta,“ segir Jami.