Bólusetningar valda ekki einhverfu. Danska heilbrigðisráðuneytið og margar aðrar stofnanir hafa lengi sagt að það séu engin tengsl á milli bólusetninga og einhverfu. Ný rannsókn danska heilbrigðisráðuneytisins staðfestir það enn frekar.
Rannsóknin birtist í Annals of Internal Medicine og skoðaði hvort það væru tengsl á milli bólusetninga fyrir mislingum, hettusótt og rauðum hundum (MMR bólusetning) og einhverfu.
Rannsakendur skoðuðu meira en 650 þúsund börn í Danmörku sem fæddust á árunum 1999-2010. Fylgst var með börnunum frá eins árs aldri þar til í lok árs 2013.
Um 95 prósent barnanna voru bólusett og 6500 af þeim voru greind með einhverfu.
Rannsakendur komust að þeirri niðurstöðu að „MMR bólusetning eykur ekki líkurnar á einhverfu [og] „kveikir“ ekki á einhverfu í næmum börnum.“
Þvert á móti kom í ljós að börn sem voru MMR bólusett voru 7 prósent ólíklegri til að vera einhverf heldur en börn sem voru ekki bólusett.
Rekja má þá hugmynd að bólusetningar valda einhverfu til rannsóknar frá 1998. Rannsóknin náði aðeins til 12 barna og voru rannsóknargögnin fölsuð. Höfundur rannsóknarinnar var sviptur læknaleyfi í framhaldinu og dró tímaritið sem birti grein um niðurstöðurnar hana til baka. Þrátt fyrir það hafði þessi rannsókn mikil áhrif á hvort að foreldrar bólusettu börnin sín og trúa því miður margir að bólusetningar valdi einhverfu.
Á vef embætti landlæknis kemur fram að MMR bólusetning veldur ekki einhverfu. „Bólusetningar eru einstakar að því leyti að þær vernda ekki barnið eingöngu heldur annað fólk líka því bólusett barn smitar ekki aðra.“
Sjá einnig: Mislingar í Garðabæ: „Vonandi náum við tökum á þessu sem allra fyrst og að hefta útbreiðslu“
Í gær komu upp mislingasmit á leikskóla í Garðabæ. Fjórir voru greindir með mislinga, tvö ungabörn og tveir fullorðnir karlmenn. Tuttugu börn, undir 18 mánaða aldri, þurfa að vera í sóttkví á heimilum sínum í tvær og hálfa viku. Mislingasmitið kom upp um borð í flugvél um miðjan febrúar.
Landlæknir áréttar mikilvægi bólusetninga á vef sínum:
„Rétt er að minna á að mislingar eru með mest smitandi sjúkdómum sem þekkjast. Engin meðferð er til við sjúkdómnum og eina fyrirbyggjandi meðferðin felst í bólusetningu sem veitir meira en 95% vörn. Þetta minnir á mikilvægi þess að halda hér uppi góðri þátttöku í bólusetningum. Bólusetning gegn mislingum er við 18 mánaða og 12 ára aldur.
Hægt er að bólusetja börn frá 6 mánaða aldri en vörn bólusetningarinnar er óviss á aldrinum 6−12 mánaða. Litlar líkur eru á vernd ef bólusett er fyrir 6 mánaða aldur.“
