„Þessi umræða má alls ekki stoppa. Það þarf að koma þessu inn hjá bæði stelpum og strákum. Að við erum nóg, erum flott eins og við erum. Útlitið er ekki allt. Persónuleikinn er ríkjandi þáttur í því hver maður er, maður er ekki útlitið. Ef maður er óánægður með útlitið þá er gott að byrja að vinna í innihaldinu, þegar það er orðið gott þá fylgir hitt.“ Segir Olga Rut Kristinsdóttir í samtali við DV.
Olga Rut segir sjálfsímynd kvenna mikið vera í umræðunni í dag og telur hún það mjög mikilvægt. Segir hún umræðuna vera þarfa í pistli sínum á lífsstílssíðunni Mana.
„Það er verið að kenna stelpum að elska sjálfa sig í þeim líkama sem þær eru. Mér finnst þetta vera svo flott og þörf umræða. Þessa umræðu hefði ég þurft að heyra þegar ég var ung stelpa. Ég er þannig vaxin að ég er frekar grönn að ofan og með stórar mjaðmir og rass. Svona hef ég verið frá kynþroska aldri. Maður var ekki flottur nema maður væri helst eins og tannstöngull, eins og öll módelin. Það var ekki flott að vera með rass, mjaðmir og læri, Kim Kardashian var ekki orðin vinsæl.“
Viðurkennir Olga að hún hafi allt sitt líf verið að miða sjálfa sig við aðrar stelpur og sér hún í dag hversu brenglað sú hugsun sé.
„Hvernig getur það meikað sens fyrir mann að miða sig við aðra, því við erum öll svo rosalega ólík.“
Þegar Olga var yngri var hún alltaf rosalega óánægð með sjálfa sig og upplifði sig feita.
„Svo varð ég ólétt nítján ára og þyngdist um þrjátíu kíló. Þá fyrst sá ég að ég var sko alls ekki feit áður en ég varð ólétt. Aldrei er maður ánægður með sig eins og maður er akkúrat í núinu. Ég eignaðist svo tvö börn til viðbótar og fitnaði í hvert skipti sem ég varð ólétt. Náði af mér kannski nokkrum kílóum inn á milli en bætti svo alltaf á mig aftur.“
Lengi barðist Olga við það að ná af sér auka kílóunum og gekk hún í gegnum marga megrunarkúra.
„Í dag er ég þrjátíu ára og hef ekki síðan ég var ung stelpa verið jafn ánægð með sjálfa mig. Ég á langt í land með að verða komin í kjörþyngd en mér er alveg nákvæmlega sama. Ég fer alveg að ná -30 kílóum frá því að ég var sem þyngst. Ég er með svuntu eftir að hafa gengið með þrjú börn sem ég játa að ég fíla ekki en þetta er samt partur af mér og minni reynslu. Ég er alveg viss um að þessi umræða hefur náð að breyta minni hugsun og kennt mér að vera ánægð með það sem ég hef. Ég vona að þessi umræða haldi áfram og nái til allra, þetta er svo mikilvægt.“
