Vinsældir sjónvarpsþáttanna Friends virðast seint ætla að dvína, en þættirnir voru efstir á lista yfir því sem Netflix-notendur horfðu hvað mest á árið 2018. Því er óhætt að segja að uppáhalds sexmenningar pöpulsins brenni enn á vörum margra, en nýverið benti einn Reddit-notandi á sameiginlegan þráð sem hann hafði ekki tekið eftir fyrr en nú – þrátt fyrir að hafa horft oftar á þættina en hollt getur talist að eigin sögn.
Notandinn segir að systkinin Ross og Monica Geller deili afar vandræðalegu leyndarmáli með foreldrum sínum. Hvað er það?
Jú, kynlífsmynband!
„Er þetta eitthvað gegnumgangandi í Geller-ættinni?“ spyr notandinn og segir betur frá: „Foreldrarnir Jack og Judy gerðu eitt sinn kynlífsmyndband (sem Monica uppgötvaði með eftirminnilegum hætti). Monica og Richard gerðu eitt slíkt og þau Chandler voru næstum því búin að gera eitt slíkt áður en Joey kom og truflaði þau. Og síðan skulum við ekki gleyma alræmda kynlífsmyndbandinu hjá Ross og Rachel.“
Annar notandi, vel kunnugur um Friends-seríurnar, bætir þá við hressilegri athugasemd: „Ef mér skjátlast ekki þá kom fram að amma þeirra systkina var býsna afbrigðileg líka. Þetta er klárlega eitthvað í Geller-ættinni.“
Þá kemur þriðji notandinn og bætir bjartsýnislega við: „Þau hefðu öll getað orðið að moldríkum raunveruleikastjörnum ef þau hefðu viljað það.“
Hvort þessi nýfundnu „afbrigðilegheit“ Geller-fjölskyldunnar hafi verið viljandi frá upphafi eða ekki, er undir áhorfendum og aðdáendum komið að dæma.
