Gamalt myndband af Cardi B hefur komið aftur upp á yfirborðið og farið í dreifingu um samfélagsmiðla. Cardi B gaf út yfirlýsingu á Instagram í kjölfarið. Stjarnan hefur ekki verið feimin um fortíð sína og talar opinskátt um tíma sinn sem strippari áður en hún naut velgengni í tónlistarheiminum.
Myndbandið sem um ræðir er þriggja ára gamalt. Í því ræðir hún um tíma sinn sem strippari og hvernig hún byrlaði karlmönnum og rændi þá.
„Ég þurfti að strippa. Ég þurfti að segja: „Ó já, þú vilt ríða mér? Jájájá, förum á þetta hótel.“ Og svo byrlaði ég þeim og rændi þá. Það er það sem ég var vön að gera,“ sagði Cardi B í myndbandinu samkvæmt mörgum fréttaveitum. Myndbandið var tekið upp á Instagram Live.
Eftir að myndbandið fór aftur í dreifingu gaf Cardi B út yfirlýsingu:
„Ég er að sjá að ‚live‘ myndband sem ég gerði fyrir þremur árum er að poppa aftur upp á samfélagsmiðlum. Í myndbandinu talaði ég um hluti sem ég þurfti að gera í fortíðinni minni, rétta eða ranga, hluti sem mér fannst ég þurfa að gera til að komast af. Ég hef aldrei haldið því fram að vera fullkomin eða koma frá fullkomnum heimi með fullkomna fortíð. Ég segi alltaf sannleikann. Ég stend alltaf við mitt.
Ég er hluti af hip-hop menningu þar sem þú getur talað um hvaðan þú kemur, talað um slæmu hlutina sem þú þurftir að gera til að komast þar sem þú ert. Það eru rapparar sem lofsyngja morð, ofbeldi, eiturlyf og rán. Glæpi sem þeim fannst þeir þurfa að gera til að komast af.
Ég hef aldrei lofsungið hlutina sem ég talaði um í myndbandinu. Ég hef aldrei sett þessa hluti í tónlistina mína því ég er ekki stolt af því og finn fyrir þeirri ábyrgð að lofsyngja þá ekki. Þetta var ákvörðun sem ég tók á sama tíma því ég hafði mjög fáa valmöguleika. Ég var heppin að hafa komist frá þessu því margar konur hafa ekki gert það.
Hvort sem þetta voru slæmar ákvarðanir á þeim tíma, þá gerði ég það sem ég þurfti til að komast af. Mennirnir sem ég talaði um í myndbandinu voru menn sem ég var að hitta, menn sem voru með fullri meðvitund, viljugir og meðvitaðir. Ég á fortíð sem ég get ekki breytt. Við gerum það öll.“
Með yfirlýsingunni skrifaði Cardi B: „Eina sem ég get gert núna er að vera betri fyrir mig, fjölskyldu mína og framtíðina mína.“