„Ég neyddist til þess að fara í veikindaleyfi hjá Icelandair vegna þess að áverkarnir sem ég fékk í bílslysinu hafa bara versnað,“ segir söngkonan og flugfreyjan Heiða Ólafsdóttir í viðtali við Fréttablaðið. Heiða lenti í bílslysi fyrir ári síðan og glímir enn við afleiðingar þess.
„Ég er með stöðugan doða í hendi og fingrum og með brjósklos í hálsi og hef auk þess þurft að takast á við mikla áfallastreituröskun. Þannig að það að brasa í minni eigin tónlist hefur alveg bjargað geðheilsunni,“ segir Heiða. Ekið var aftan á bifreið hennar þegar hún beið á rauðu ljósi. Bíllinn sem keyrði á hana var á mikilli ferð, en hnykkurinn sem hún fékk á hálsinn endaði í brjósklosi.
„Það kom gríðarlega aftan að mér hvernig eitthvað svona aulalegt getur haft miklar og alvarlegar afleiðingar. Þetta er búið að valda mér mikilli áfallastreitu.“
Heiða hefur fundið huggun í tónlistinni og er að gefa út nýja plötu, en öll lögin eiga það sameiginlegt að fjalla um „ást, von og yl.“ Lögin eru eftir nokkra af uppáhalds tónlistarmönnum Heiðu, til dæmis Bjartmar Guðlaugsson, Jóhann Helgason og Gunnar Þórðarson.
„Mig langar að fólk heyri eitthvað sem færir þeim bjartsýni og þótt ástin, vonirnar og væntingarnar geti oft verið erfiðar þá er ekkert verra en að missa vonina. Það er það versta sem getur komið fyrir fólk,“ segir Heiða sem heldur útgáfutónleika í Salnum í Kópavogi á laugardagskvöld.
