Ólympíuverðlaunahafinn Kelly Catlin, sem varð heimsmeistari með félögum sínum í bandaríska landsliðinu í hjólreiðum í þrígang, svipti sig lífi í herbergi sínu á heimavist í Kaliforníu síðastliðið föstudagskvöld. Systir hennar, Christine Catlin, opnar sig um fráfall systur sinnar í samtali við tímaritið People.
Christine segir að Kelly hafi verið illa stödd nokkrum vikum fyrir sjálfsvígið.
„Við töluðum saman í síma og hún sagðist annað hvort vera að meta hlutina og njóta lífsins eða að ef hlutirnir breyttust ekki næsta mánuðinn ætti hún örugglega eftir að svipta sig lífi,“ segir Christine. „Það eru aðeins tvær vikur síðan. Ég hélt að við ættum meiri tíma saman. Það síðasta sem ég sagði við hana var: Plís, ekki drepa þig.“
Christine segir að herbergisfélagi Kelly á heimavistinni við Stanford-háskóla hafi komið að henni á föstudagskvöld og gert yfirvöldum viðvart. Kelly var við meistaranám í verkfræði þegar hún lést.
„Ég var að hjóla þegar ég fékk fréttirnar og mamma mín hringdi,“ segir Christine um daginn sem systir hennar dó. „Við höfðum áhyggjur því Kelly hafði ekki svarað símanum í um það bil viku. Ég fékk slæma tilfinningu um það. Ég byrjaði að ofanda og gráta þegar mamma hringdi. Ég hef verið dofin síðan,“ bætir hún við.
Að sögn fjölskyldumeðlima hjólreiðakonunnar var hún búin að glíma við andleg veikindi síðan í desember, þegar hún fékk heilahristing í hjólreiðakeppni. Í kjölfarið fékk hún slæma höfuðverki, upplifði sjóntruflanir og gat ekki æft með liðinu sínu. Faðir Kelly, Mark Catlin, segir við People að dóttir sín hafi misst móðinn við meiðslin.
„Ég og konan mín töluðum við hana í síma vikulega og hún var byrjuð að missa áhugann á hjólreiðum. Hún hafði aldrei gert það áður,“ segir hann. „Hún hafði minni áhuga á Ólympíuliðinu, á æfingum, á öllu í lífinu. Við höfðum áhyggjur. Hún gekk fram af sér. Heilahristingurinn hafði djúpstæð áhrif á hana. Hún glímdi við þessi andlegu veikindi og fannst eins og hún væri föst.“
Kelly reyndi að fremja sjálfsvíg í janúar síðastliðnum, en lifði af og fór í andlega og líkamlega endurhæfingu í tvær vikur. Systir hennar, Christine, segir að sjálfsvígstilraunin hafi komið fjölskyldunni í opna skjöldu og að Kelly hafi sent nánum vinum og fjölskyldumeðlimum orðsendingu áður en hún reyndi að svipta sig lífi.
„Hún skrifaði að hugsanir hennar væru á fleygiferð og að hugur hennar virkaði ekki eins og áður,“ segir Christine. „Hún lýsti því hvernig hún var andlega pyntuð því hún gat ekki gert allt sem hún gat áður fyrr.“