Það hefur lengi tíðkast að konur fari í prufugreiðslu fyrir brúðkaupsdaginn sinn til þess að fullvissa sig um að þær séu ánægðar með greiðsluna og sáttar við útfærslu þess sem gerir hana.
Kona ein frá Bandaríkjunum vildi líklega óska þess í dag að hún hefði farið í prufugreiðslu fyrir brúðkaupið sitt en hún greiddi rúmlega 12 þúsund krónur fyrir greiðslu sem hún segir ekkert líkjast því sem um var samið.
„Ég set þetta bara hér… Myndin til vinstri er greiðslan sem ég bað um… Myndin til hægri er greiðslan sem ég fékk. Þetta var reyndur hárgreiðslumeistari sem ég borgaði meira en 12 þúsund krónur fyrir greiðsluna,“ segir konan miður sín. Daily Mail greinir frá því að þúsundir manns hafi þegar brugðist við færslu konunnar sem hún deildi á Facebook.
„Ef þú ert nú þegar að gera hryllilega greiðslu, reyndu þá að minnsta kosti að fela spennurnar. Ég hefði ekki orðið ánægð með ef þetta væri mín greiðsla, sérstaklega ekki þar sem þú sérð spennurnar augljóslega. Vonandi fékkst þú endurgreitt,“ segir ein manneskja við færsluna.
Aðrir brugðu á það ráð að deila sjálfir myndum af misheppnuðum greiðslum sem þeir fengu á stórum dögum í lífi þeirra og samkvæmt þeim er ekki svo vitlaust að taka sér tíma til þess að setjast í stólinn hjá hágreiðslumeistaranum fyrir stóra daginn. Bara svona til öryggis.