„Ég skammaðist mín svo fyrir þessar hugsanir. Ég vildi ekkert með hana hafa. Ég vildi helst drepa sjálfa mig og hana til að komast út úr þessari vanlíðan til að þurfa ekki að díla við þessar tilfinningar á þessum tíma. Þetta var hræðilegur tími,“ segir Kristín Rut Eysteinsdóttir í innslagi í Íslandi í dag.
Kristín sagði sögu sína af alvarlegu fæðingarþunglyndi í kjölfar fæðingu yngri dóttur sinnar í DV fyrir stuttu. Í viðtalinu sagðist hún ekki hafa upplifað neina sorg þegar að eldri dóttir hennar kom í heiminn.
„Eftir að ég átti eldri stelpuna mína var lífið frábært. Ég gjörsamlega blómstraði í því hlutverki að vera mamma,“ sagði Kristín og hélt áfram. „Ég byrjaði að veikjast þegar ég átti yngri stelpuna mína. Þunglyndið byrjaði ómeðvitað á meðgöngunni og þegar hún kom í heiminn sprakk allt. Ég fann engar tilfinningar til hennar og mig langaði ekkert að eiga hana. Það var engin ást til staðar.“
Í viðtali við Ísland í dag lýsir Kristín því að hún hafi verið mjög reið þegar að yngri dótturin þurfti að fá brjóst, en þær mæðgur dvöldu fyrstu vikurnar á geðdeild.
„Ég var ótrúlega pirruð og reið þegar hún þurfti að fara á brjóst og setja hana á það og gefa henni sína næringu. Þetta var ekki notaleg stund. Ég var bara: „Viltu ekki deyja krakki.“ Ég var bara brjáluð út í hana því hún þurfti alltaf að fara á brjóst. Ég þurfti að sinna henni.“
Í viðtali við DV sagði Kristín að barnið hefði verið tekið af henni á meðan hún dvaldi inni á geðdeild.
„Lífið var mjög erfitt eftir fyrstu innlögnina á geðdeild. Þegar dóttir mín var níu vikna var ákveðið að mamma mín myndi taka hana og eldri dóttur mína að sér sem fósturbörn. Síðan þá hafa þær búið hjá mömmu minni,“ sagði Kristín. Í Íslandi í dag fer Kristín nánar yfir af hverju hún missti börnin sín, en hún reyndi nokkrum sinnum að svipta sig lífi.
„Það var ekki nóg fyrir mig að hugsa að ég ætti tvær stelpur sem þurftu á mömmu sinni að halda,“ segir Kristín. „Þegar ég var með hana inni á geðdeild þá fer ég í hálfgert geðrof að ég þrengdi að hálsinum á yngri stelpunni minni,“ bætir hún við og brotnar niður.
Ítarlegt viðtal við Kristínu í DV má lesa hér. Hér má svo horfa á innslag Íslands í dag.
