Samantha Simpson er nítján ára gömul, bandarísk kona sem er gift manni sem kallaður er JR. JR er 62ja ára gamall og er Samantha búin að fá sig fullsadda yfir því að fólk kalli eiginmann sinn vögguræningja.
Samantha var kynnt fyrir JR af sameiginlegum vinum þegar hún var átján ára gömul. Fjölskylda hennar sætti sig ekki við sambandið og því fluttu Samantha og JR inn saman og búa nú í Wichita í Kansas. Þau trúlofuðu sig eftir stutt samband og gengu í það heilaga í byrjun janúar. Nú reyna þau að eignast barn saman.
Samantha segist lenda í áreiti daglega og að eiginmaður hennar sé kallaður öllum illum nöfnum, svo sem vögguræningi og barnaníðingur. Þá eru margir sem halda að hann sé afi hennar.
„Þegar við erum úti á meðal fólks heldur ókunnugt fólk oft að hann sé afi minn og það kemur mér í uppnám. En verra er þegar að fólk kallar JR vögguræningja eða barnaníðing þegar það sér okkur haldast í hendur eða kyssast,“ segir Samantha í viðtali við Metro. „Við förum aldrei út án þess að einhver tjái sig um sambandið okkar og það er þreytandi. Við höfum gengið í gegnum erfiða tima því fjölskylda og vinir samþykkja ekki sambandið en það er of mikið þegar að ókunnugir gera það ekki heldur. Við viljum bara að fólk geri sér grein fyrir að við erum hamingjusamlega gift og tökum samband okkar alvarlega – og annað fólk ætti ekki að mismuna okkur svona.“
Samantha segist hafa fallið fyrir JR við fyrstu sýn og segir hann mikinn herramann.
„Hann var svo vel máli farinn í hvert sinn sem við hittumst, en einnig þegar að við töluðum saman í síma eða skiptumst á skilaboðum. Hann var bara eitthvað sem ég hafði aldrei fundið í karlmanni áður. Ég hef deitað menn sem voru nær mér í aldri en þeir voru alltaf svo óþroskaðir og vissu ekki hvernig ætti að koma fram við maka sinn,“ segir Samantha.
„Að vera með JR er algjörlega öfugt – hann er svo þroskaður og kemur fram við mig eins og drottningu. Ég myndi ekki breyta neinu við hann eða samband okkar.“
JR á barn úr fyrra sambandi og nú vonast hjónin eftir því að eignast barn saman.
„Vonandi hættir áreitið þegar að barnið fæðist því við viljum ekki ala upp barn í umhverfi þar sem það heyrir ógeðslegt tal um föður sinn. Við vonum að með því að deila sögunni um samband okkar að fólk muni gera sér grein fyrir því að þetta er ekki grín og að við tökum sambandið mjög alvarlega þrátt fyrir aldursmuninn og útlit okkar.“