Dansarinn Frankie Grande er á lausu eftir ansi áhugavert samband við hjónin Daniel Sinasohn og Mike Pophis. Í viðtali við Us Magazine segist hann hafa fengið mikla athygli frá karlmönnum eftir að hann sagði hjónunum upp.
„Valentínusardagurinn var áhugaverður,“ segir dansarinn, sem er 36 ára gamall. „Þetta er áhugavert. Þegar ég varð einhleypur fékk ég svo mörg skilaboð frá strákum sem ég hafði ekki talað við svo lengi. Þeir sögðu til dæmis: Elskan, hvað ertu að gera í dag? Hvað segirðu? Og ég hugsaði: Guð minn góður, hvað er að gerast? Þannig að ég held að fólk finni lyktina af því þegar ég er einhleypur.“
Frankie segist vera tilbúinn að fara á stefnumót aftur eftir sambandsslitin og leitar að hinum eina rétta.
„Þetta verður ár ástarinnar. Ég er viss um það.“
Fréttir um samband Frankies við hjónin Daniel og Mike birtust á síðari hluta seinasta árs, en þegar að fjölmiðlar komust á snoðir um sambandið hafði það varað í þrjá mánuði.
„Ég er mjög þakklátur fyrir síðasta sambandið mitt. Ég þroskaðist mikið en á sama tíma virkaði það ekki. Ég er mjög glaður að við ákváðum að enda það á vinalegum nótum. Og að við getum verið vinir áfram. Það er mikilvægt,“ segir hann.
