Riverdale-leikkonan Lili Reinhart hefur leitað sér sálfræðimeðferðar við kvíða og þunglyndi, en hún tilkynnti það í sögu sinni á Instagram. Sagt er frá þessu á vef Us Magazine.
„Vinaleg ábending til þeirra sem þurfa að heyra það,“ hóf Lili opinberun sína á Instagram. „Sálfræðimeðferð er ekki eitthvað sem maður á að skammast sín fyrir. Allir geta haft gott af því að leita til sálfræðings,“ bætti hún við.
„Það skiptir ekki máli hve gamall maður er eða hve „stoltur“ maður er að reyna að vera. Við erum öll manneskjur. Og við göngum öll í gegnum erfiðleika. Ekki þjást í þögninni. Ekki skammast þín fyrir að biðja um hjálp.“
Lili hefur opnað sig um geðræn vandamál sín áður, en í viðtali við Seventeen í apríl í fyrra sagðist hún hafa þjáðst af félagslegum kvíða alla tíð.
„Ég á erfitt með samkomur og veislur. Ég vil frekar vera heima og lesa bók.“
Hún hefur jafnframt áður leitað sér hjálpar við þessum vandamálum, þrátt fyrir ungan aldur.
„Ég er 22ja ára. Ég er með kvíða og þjáist af þunglyndi. Og í dag byrja ég í meðferð á nýjan leik. Nú hefst vegferð sjálfsástar fyrir mig. Og gangi ykkur vel á ykkar vegferð,“ skrifaði hún á Instagram.
