„Að keppa í vaxtarrækt þýðir ekki að þú fáir átröskun. Ég hef undirbúið mig fyrir sýningar og gert það á heilbrigðan hátt en um leið og ég fæ þráhyggju fyrir útliti mínu, hverju ég á að borða og hverju ég á ekki að borða þá veit ég að ég er ekki á góðum stað.“
Á þessum orðum hefur fitnessdrottningin Margrét Gnarr færslu sína á Instagram sem hún birti í gær. Margrét birti tvær myndir af sér með færslunni, á annari þeirra má sjá þar sem líkami hennar er í góðu jafnvægi en á hinni má sjá ástand hans þegar Margrét er komin með þráhyggju fyrir útliti sínu.
„Þegar ég fæ þráhyggju þá veit ég að ég er að leyfa átröskun minni að stjórna mér og ég nýt þess ekki lengur að undirbúa mig. Það er erfitt að komast út úr því og á síðasta ári varð ég að hætta að keppa vegna þess að ég vissi hversu langt þráhyggjan gat farið með mig,“ segir Margrét.
Viðurkennir Margrét að hún hafi þurft að taka sér hlé til þess að koma jafnvægi á líf sitt og til þess að leifa líkama hennar og huga að jafna sig.
„Fólk spyr mig hvenær ég mun stíga aftur á svið og ég segi þeim að af því verði þegar bæði líkami minn og hugur hefur jafnað sig. Ég er á mjög góðum stað einmitt núna og ég finn fyrir meira jafnvægi hvern dag. Ég hef enn slæma daga… Það eru enn dagar þar sem átröskunin reynir að sannfæra mig um það að ég verði að líta öðruvísi út og segir mér að sleppa því að borða og æfa meira. En þessi rödd hefur ekki lengur stjórn á mér. Hugsunin kemur upp í nokkrar sekúndur eða mínútur og þegar það gerist þá þarf ég að sleppa tökunum. Ég þarf að minna sjálfa mig á það hversu langt ég er komin í bata og af hverju ég þarf að vera í bata.“
Segist Margrét vilja vera í bata vegna þess að hún vilji vera heilbrigð, sterk og í jafnvægi. Hún vilji vera fyrirmynd og hjálpa öðrum ásamt því að vera til staðar fyrir þá sem hún elskar í lífinu.
