Ónefndur maður sendi skilaboð um „að verða skakkur“ í rangt númer. Númerið átti lögreglumaður hjá lögreglunni í Winfield í Missouri og var svar hans alveg stórkostlegt.

Lögreglustöðin deildi skjáskotum af skilaboðunum á Facebook-síðu sinni og hafa netverjar mjög gaman á uppátæki lögreglumannsins.

Samskipti þeirra byrja um klukkan fimm síðdegis á föstudegi. Maðurinn spyr „stelpuna“ hvort henni langar út sama kvöld.

„Hey viltu koma með á leikinn í kvöld? Það mun ekki kosta þig neitt, frí pulsa og gos,“ stóð í skilaboðunum.

Lögreglumaðurinn svaraði þá: „Ég væri mjög til í að fara á leikinn í kvöld! En því miður held ég að þú sért með rangt númer.“

Maðurinn sendi þá: „Nei. Við fórum á leikinn saman.“

„Hvaða leik fórum við á?“ Spyr þá lögreglumaðurinn.

„Með Shari og Diönu. Við urðum skökk saman stelpa. Klæddu þig og ég skal sækja þig, er á trukknum manstu.“

Þá kom stórkostlegt og bráðfyndið svar lögreglumannsins. Mynd af honum með lögreglumerki sitt.

„Nokkuð viss um að við urðum ekki skakkir saman.“

Lögreglumaðurinn fékk ekkert svar og ákvað að stríða honum aðeins meira með því að senda tvö önnur skilaboð.

„Ætlarðu enn þá að sækja mig fyrir leikinn samt?“ Og: „Ég var farinn að hlakka mjög mikil til að fara á leikinn.“

Loksins svaraði maðurinn og sagðist vera með rangt númer.

„Ég reyndi að segja þér það en neiiiiii, ég veit ekki um hvað ég er að tala,“ sagði lögreglumaðurinn.

„Þú mátt hætta,“ sagði þá maðurinn og þar með lauk samskiptum þeirra.

Skjáskotin hafa gengið eins og eldur í sinu um netheima og lofa margir lögreglumanninn fyrir að hafa húmorinn í lagi.

„Þetta er það besta sem ég hef séð í allan dag! Vel gert!“