fbpx
Miðvikudagur 21.ágúst 2019  |

Tekjublað 2019  Sjá allt

Bleikt

Arna sigraði í Biggest Loser og deilir nú hvetjandi myndum á samfélagsmiðlum: „Ég er svona, og hvað?“

Guðrún Ósk Guðjónsdóttir
Þriðjudaginn 16. júlí 2019 21:06

Arna Vilhjálmsdóttir. Myndin uppi til hægri er umsóknarmynd hennar í Biggest Loser Ísland. Hinar myndirnar eru nýjar.

Ekki missa af Helstu tíðindum dagsins í pósthólfið þitt

Lesa nánar

Arna Vilhjálmsdóttir stóð uppi sem sigurvegari Biggest Loser Ísland árið 2017. Í keppninni missti Arna sextíu kíló og fann þar að auki ástina. Hún og annar keppandi þáttanna, Guðjón Bjarki Ólafsson, skutu saman nefjum og eru enn saman í dag.

Arna fékk nóg af því að fela sig og líkama sinn, eftir að hafa stigið upp á vigt á íþróttatopp fyrir framan þjóðina ákvað hún að nú væri ekki aftur snúið. Hún heldur úti vinsælum Instagram-aðgangi og deilir hvetjandi myndum með jákvæðum boðskap. Arna sýnir sig alveg eins og hún er til að hvetja sig sjálfa og aðra.

Arna fer yfir Biggest Loser ævintýrið, viðbrögðin við myndunum á Instagram og núverandi rútínu í einlægu viðtali við DV.

View this post on Instagram

Ég hef ekki farið í bikiní síðan sumarið 2000. Það eru 18 ár síðan. Ég hélt bara að stelpur eins og ég ættu ekki að vera í bikiníi innan um annað fólk. En BOY WAS I WRONG! I look like a million dollars. Mér er alveg sama hver sér mig – hver hefur skoðun á því hvort ég sé búin að þyngjast/ fitna – hver hefur skoðun á aukahúðinni minni – því fyrir einu og hálfu ári var ég þunglynd og hefði ALDREI farið i bikiní fyrir framan neinn, ekki einu sinni mig sjálfa. Skál fyrir mér, skál fyrir líkamanum mínum og SKÁL FYRIR ÞESSU BROSI – því það er ósvikið og afslappað aaalveg eins og ég!! #bikinibody #allbodiesaregoodbodies #mentalhealth

A post shared by Arna Vilhjálms 🏋🏻‍♀️ (@arna1403) on

Síðasta hálmstráið

Arna hafði sótt um í Biggest Loser Ísland áður en ekki komist inn.

„Ég hef alltaf elskað Biggest Loser. Ég er gömul íþróttastelpa og sá alltaf fyrir mér að ef ég myndi bara komast þarna inn þá gæti ég þetta alveg,“ segir Arna.

„Á þessum tíma var ég komin á rosalega slæman stað andlega og ég ákvað að gefa þessu annan séns og reyna að komast í þættina. Þetta var síðasta hálmstráið sem ég var að reyna að grípa í til að koma mér á rétt ról.“

Arna fékk inngöngu í þættina og var einn af tólf keppendum.

„Mér fannst rosalega skrýtið og óraunverulegt að vera í þáttunum. Ég hélt alltaf að ég væri að fara að verða send heim. En ég lenti í ótrúlega góðu liði með Gurrý sem þjálfara, og við erum enn þá í miklu sambandi í dag við Gurrý,“ segir Arna.

„Ég held að það hafi verið algjörlega lukkan fyrir mig, að lenda í þessu liði því það leyfði mér enginn að gefast upp. Þó svo að ég hafi lent á spítala tvisvar vegna ofþornunar, þá var mjög gott andrúmsloft í hópnum okkar og það var ekki hægt að gefast upp.“

Arna stóð uppi sem sigurvegari Biggest Loser Ísland og missti 60,2 kíló. Hún vó í upphafi þáttanna 154,2 kíló en í lokin var hún 94 kíló.

View this post on Instagram

Ég fór aldrei í sund neins staðar annars staðar en á Neskaupstað eftir að ég byrjaði í menntaskóla. Þar þekkja mig allir og enginn dæmdi mig. Ef svo ólíklega vildi til hinsvegar að ég færi eitthvað annað, klæddi ég mig í og úr inni á baði og fyrir aftan handklæði og ég veit ekki hvað og hvað. Ég skildi ekki af hverju ég var svona í laginu. Af hverju ég væri með þessa poka undir brjóstunum, af hverju ég væri svona og hinsegin. Ég dauðskammaðist mín og grét oft eftir sundferðir – þar sem ég saknaði svo íþróttaÖrnu sem æfði fjórar íþróttir og þar á meðal sund í um 8 ár!!!! Ég hugsaði held ég á hverjum degi að ég gæfi allt fyrir að verða mjó og verða íþróttaArna aftur. Ég er orðin íþróttaArna. Ég þarf ekki að vera mjó til að vera ég. Útlitið mitt passar við persónuleikann minn – hann lýsir sér eftirfarandi: metnaðargjörn, keppnissöm, elskar íþróttir af öllu tagi. Eru þessir pokar með aukahúð sem breyta mér og hvernig ég er? Nei, held nú ekki. Ég er nákvæmlega það sem ég er af því líkaminn minn skilgreinir mig og minn persónuleika ekki. Ég er hinsvegar með átröskun sem ég er að vinna í á hverjum degi, og þegar ég misstíg mig, þá er það ekki af þvi ég er óánægð með líkamann minn. Það er vegna þess að tengingin við að borða og hvað það gerir líkamanum mínum er skemmd. Þegar ég misstíg mig hugsa ég ekki í sekúndu hvað það gerir líkamanum mínum. Ég hins vegar stend alltaf upp aftur og það eigum við ALLTAF að gera. Lífið er rétt að byrja og það er aaaaaðeins of snemmt að gefast upp núna, er það ekki?? Að þessu sögðu er ég farin í ræktina, því íþróttaArna elskar að vera þar!!!! . . . . . #body #health #weightloss #weightlossjourney #extraskin

A post shared by Arna Vilhjálms 🏋🏻‍♀️ (@arna1403) on

Hvetjandi skilaboð

Arna naut mikilla vinsælda í þáttunum og hafa vinsældirnar haldið áfram á samfélagsmiðlum. Hún er með rúmlega 2400 fylgjendur á Instagram og hafa myndir hennar og hvetjandi skilaboð vakið mikla athygli. Við spurðum Örnu út í Instagram og hvað kom til að hún byrjaði að deila jákvæðum boðskap með öðrum.

„Þetta hjálpar mér ótrúlega mikið. Ég hugsaði að ef einhver sér mig hreyfa mig, eins og ég hafði séð aðra hreyfa sig í mörgum Biggest Loser þáttum á undan, og ég sé hvatning fyrir aðra, þá er það þess virði,“ segir Arna.

„Ef ég held áfram að sýna mig alveg eins og ég er, allar mínar fellingar, þá kannski hjálpar það einhverjum. Það hefur verið hvatning fyrir mig í gegnum þetta.“

Viðbrögðin

Arna hefur fengið mjög jákvæð viðbrögð við myndunum og skilaboð frá fjölbreyttum hópi fólks.

„Ég hef fengið skilaboð frá konu sem sagðist hafa sýnt dóttur sinni myndir af mér, en dóttir hennar var á slæmum stað. Hún sagðist hafa sagt dóttur sinni að allt væri hægt og þær horfðu á þáttaröðina með mér. Svo hef ég líka fengið skilaboð frá stelpu sem er 50 kíló og á erfitt með að sýna sig í sundi en fær innblástur að sjá mig því mér er sama hvað öðrum finnst. Það er allur skalinn af fólki sem hefur samband við mig og mér finnst það æði,“ segir Arna.

Að hafa hausinn í lagi

Síðustu vikuna í Biggest Loser æfa keppendur mikið og losa sig við vatnsþyngd síðasta daginn. Í kjölfarið geta þeir þyngst eftir keppni og það gerðist fyrir Örnu. Arna segir að henni hafi liðið illa vegna þessa en hafi lokað fyrir neikvæðu hugsanirnar eftir samtal við kærastann sinn.

„Ég ákvað að fara ekki aftur á þann stað að skammast mín fyrir sjálfa mig eða fara í felur. Ég ákvað að segja bara þetta er ég og sýna að lífið er upp og niður. Þess vegna set ég myndir af mér alveg eins og ég er. Ég er svona, og hvað?“

Arna segir að það hvetji hana áfram að sýna bæði sjálfri sér og öðrum hvernig hún er og hvað hún getur.

„Þegar allir á Íslandi eru búnir að sjá mann, 154 kíló upp á vigt, þá falla einhverjir múrar og maður þarf að halda áfram í gegnum það,“ segir Arna.

Hreyfing og mataræði í dag

Áhugi Örnu á hreyfingu kviknaði í Biggest Loser. Hún er ekki aðeins að æfa heldur er hún einnig þjálfari.

„Ég reyni líka að mæta í alla þá hóptíma sem mig langar að fara í. Ég setti mér snemma markmið að vera ekki hrædd við að prófa neitt,“ segir Arna.

Samkvæmt Örnu eru hlutföllin í átt að árangri ekki eins og margir halda fram, mataræði 80 prósent og hreyfing 20 prósent. Hún segir að mataræði sé 95 prósent. „Í alvöru, lykillinn að þessu er mataræði,“ segir hún.

Arna hefur prófað ýmislegt í mataræðinu, eins og ketó.

„Ég er að prófa mig áfram í því sem hentar hverju sinni,“ segir Arna. „Ég prófaði ketó fyrir stuttu og léttist þá töluvert. En þar sem ég er ekki með gallblöðru þá hentar það mér ekki að borða svona hátt hlutfall af fitu yfir langan tíma.“

View this post on Instagram

Að mæta er erfiðasta og stærsta skrefið. Ég hef aldrei séð eftir því að mæta en ég sé eiginlega alltaf eftir því ef ég sleppi því. Það er enginn að fylgjast með mér – það eru allir þarna til þessa að gera sjálfan sig betri. Eyddu tímanum í að gera það sama og skildu ekkert eftir. @katrintanja sagði það best í viðtalinu við @snorribjorns – gerðiru í alvöru þitt besta? Ég vil labba út og hugsa ég skildi allt eftir. Alveg sama þó það sé kaldur þriðjudagsmorgun í janúar – hver einasta æfing skiptir máli og þess vegna kem ég fram við hana eins og ég ætli að toppa mig frá þeirri síðustu. ———————————————————— #gym #weightloss #weightlossjourney #biggestloser #2019 #fit #fitnessmotivation

A post shared by Arna Vilhjálms 🏋🏻‍♀️ (@arna1403) on

Vigtar sig ekki sjálf

Arna fylgist ekki með tölunni á vigtinni. „Gurrý sér um það og ég fer í vigtun til hennar. Hún hnippir í mig ef henni finnst ég vera að fara of hátt upp eða of lágt niður. Eftir að hafa verið í sjö mánuði, stanslaust að hugsa um hvert einasta gramm, þá finnst mér fínt að vita ekkert og hún sér um þetta og lætur mig vita ef einhverju er ábótavant,“ segir Arna.

Markmið Örnu í dag snúa að árangri í ræktinni og gera hreyfingu stærri hluta að daglegu lífi, eins og að ganga í búðina eða hitta vinkonurnar í göngutúr.

Ráð til annarra

Hvaða ráð myndirðu gefa þeim í sömu sporum og þú varst?

„Ekki hætta að reyna að finna eitthvað. Það kemur alltaf eitthvað á endanum sem að smellur. Eins og Biggest Loser var það fyrir mig, en ég veit að það hafa ekkert allir tök á að fá svona mikla aðstoð. En ef maður hættir aldrei að reyna þá kemur eitthvað sem virkar,“ segir Arna.

„Með tímanum mun löngunin koma að hreyfa sig og gefa líkamanum gott og hollt að borða. Ef maður bara prófar aftur og aftur þá mun eitthvað smella. Treystu mér.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Bleikt
Fyrir 2 dögum

Nektarmynd óléttrar Ashley Graham tekið fagnandi

Nektarmynd óléttrar Ashley Graham tekið fagnandi
Bleikt
Fyrir 2 dögum

Fær óviðeigandi skilaboð daglega frá karlmönnum sem vilja vera „sykurpabbar“ hennar

Fær óviðeigandi skilaboð daglega frá karlmönnum sem vilja vera „sykurpabbar“ hennar
Bleikt
Fyrir 5 dögum

Læknir sagði nýrri móður að grennast til að líða betur – Kom í ljós að hún var með krabbamein

Læknir sagði nýrri móður að grennast til að líða betur – Kom í ljós að hún var með krabbamein
Bleikt
Fyrir 5 dögum

Pixee vill vera „lifandi teiknimyndafígúra“ – Hefur látið fjarlægja sex rifbein og endurbyggja skapabarmana

Pixee vill vera „lifandi teiknimyndafígúra“ – Hefur látið fjarlægja sex rifbein og endurbyggja skapabarmana
Bleikt
Fyrir 1 viku

Svona losnaði Ólympíustjarnan við kviðfituna – Auðveldara en þú heldur

Svona losnaði Ólympíustjarnan við kviðfituna – Auðveldara en þú heldur
Bleikt
Fyrir 1 viku

Milljónamæringur gagnrýndur fyrir að flengja fyrirsætur á snekkju – Sjáðu myndbandið

Milljónamæringur gagnrýndur fyrir að flengja fyrirsætur á snekkju – Sjáðu myndbandið

Tarot Spil

Veldu þér spil og sjáðu spádóm þinn.