Athafnakonan og verslunareigandinn Gerður Huld Arinbjarnadóttir er um þessar mundir stödd á flakki um heiminn ásamt kærasta sínum Jakobi Fannari Hansen. Parið hefur í dágóðan tíma heillast af markþjálfanum Tony Robbins og hafa þau setið nokkur námskeið hjá honum víðsvegar um heiminn.
Á dögunum fékk parið boð um að mæta í viðburð í Amsterdam sem einungis hundrað manns á vegum Tony Robbins fengu boð í.
Viðburðurinn var haldinn til styrktar samtökunum „Free a Girl“ sem var stofnað árið 2008 með það að markmiði að frelsa ungar stúlkur sem hafa verið hnepptar í kynferðislegt þrælahald.
„Þetta er sem sagt viðburður sem er haldinn fyrir platínummeðlimi hjá Tony Robbins. Hundrað manns var boðið að mæta og fengum við tækifæri til þess að styrkja þetta málefni og hjálpa til við að bjarga konum úr kynlífsþrælkun. Það kostar þúsund dollara að bjarga einni konu og sjá henni fyrir menntun til þess að geta hafið nýtt líf,“ segir Gerður í samtali við blaðamann.
Samkvæmt gengi eru þúsund dollarar tæplega 125 þúsund krónur. Markmið samtakananna er að opna augu fólks fyrir því hversu algeng kynlífsþrælkun barna er, bjarga þeim úr erfiðum aðstæðum og sjá þeim fyrir menntun og almennilegum lífsgæðum.
