Alexandra Helga birti rétt í þessu mynd á Instagram af brúðarkjólnum sem hún klæddist þegar hún játaðist sínum heittelskaða, knattspyrnukappanum Gylfa Þór Sigurðssyni síðustu helgi.
Kjóllinn var sérsaumaður á Alexöndru og kemur úr smiðju tískuhússins Galia Lahav, sem stofnað var af ísraelska fatahönnuðinum Galia Lahav árið 1984 í Tel Aviv.
Galia Lahav er hvað þekktust fyrir gala- og brúðarkjóla og hafa kjólar hennar prýtt síður allra þekktustu tískutímarita heims. Þá klæddist söngkonan Beyoncé sérsaumuðum kjól frá Galia Lahav þegar hún endurnýjaði heit sín við eiginmanninn, Jay-Z.
Það er vægt til orða tekið að segja að Alexandra hafi geislað á brúðkaupsdaginn og er hún í skýjunum með kjólinn, eins og hún segir frá á Instagram.
„Draumakjóllinn minn, nákvæmlega eins og ég vildi hafa hann á allan hátt. Ég elskaði hvert smáatriði og naut hverrar sekúndu í þessum kjól,“ skrifar Alexandra.
Algengt verð á brúðarkjólum frá Galia Lahav er um tvær milljónir króna, en þá er um að ræða kjóla beint af rekkanum, ekki sérsaumaða eins og í tilfelli Alexöndru. Þá er hægt að festa kaup á notuðum Galia Lahav brúðarkjólum á netinu, en verð á þeim nokkrum fer yfir eina milljón króna. Því má leiða að því líkur að kjóll Alexöndru hafi farið talsvert yfir tvær milljónir króna, jafnvel teygt sig yfir átta stafa töluna.