Fréttir þess efnis á dögunum að leikarinn Bradley Cooper og fyrirsætan Irina Shayk væru hætt saman vöktu mikla athygli. Sumir töldu að ákvörðunin hefði eitthvað með það að gera að Cooper og Lady Gaga, sem léku saman í myndinni A Star Is Born, væru farin að draga sig saman.
Raunin er þó önnur ef marka má heimildarmann Entertainment Tonight. Vefmiðillinn sagði að það hefði verið Irina sem ákvað að láta gott heita, en ekki Bradley Cooper eins og margir töldu.
Heimildarmaðurinn segir að Irina hafi talið að samband hennar og Cooper væri komið á endastöð, meðal annars vegna þess að Cooper virtist ekki tilbúinn til að „skuldbinda sig“ eins og það var orðað. Bradley Cooper og Irina Shayk eru bæði staðföst og með bein í nefinu. Segir heimildarmaðurinn að þau hafi oft verið ósammála og oft rifist.
„Þau eru mjög ólíkir einstaklingar og um leið og þau áttuðu sig á því að það var barnið sem hélt þeim saman ákváðu þau að láta gott heita,“ segir heimildarmaðurinn en Irina mun þó hafa átt frumkvæðið. Þau eignuðust dótturina Lea De Seine Shayk Cooper saman fyrir tveimur árum.
Ef marka má fréttir Entertainment Tonight lá skilnaðurinn í loftinu í þó nokkurn tíma. Þau voru nálægt því að skilja um það leyti sem A Star Is Born kom út en biðu og ákváðu að freista þess að lagfæra sambandið þegar kynningarherferð vegna myndarinnar var yfirstaðin. Það gekk þó ekki eins og greint var frá á dögunum.