Ben Carpenter, 35 ára einhleypur faðir, var að ættleiða sitt fimmta barn. Það er kannski ekki til frásögu færandi nema að öll fimm börnin hans eru fötluð.
Fimmta barnið hans er eins árs strákurinn Noah. Hann er með sjaldgæfan erfðagalla sem kallast Cornelia de Lange heilkenni.
Þessi einhleypi faðir var upphaflega áhyggjufullur með það að ættleiða en reynsla hans með fötluðum börnum og fullorðnum gaf honum byr undir báða vængi.
„Ég var viss um að ég yrði ekki tekinn alvarlega þar sem ég er einhleypur en ég varð himinlifandi þegar ég komst að því að sú var ekki raunin“
Börnin hans eru öll með mismunandi fatlanir. Elsta barnið hans, Jack, er einhverfur. Ruby hefur takmarkaða getu í höndunum þar sem hana vantar bein og vegna Pierre Robin heilkennisins. Lily er heyrnarlaus og Joseph er með Downs heilkenni.
Ben hefur aldrei fundið fyrir þörfinni að eignast sín eigin börn. Hann segir að það sé miklu meira sem tengir foreldra við börnin sín heldur en það að deila sömu genum.
„Börnin mín eru börnin mín, þau eru kannski ekki með sama blóð og ég en hverjum er ekki sama!“
Þessi fimm barna faðir segist ekki búast við því að ættleiða fleiri börn en hann hefur samt ekki tekið hugmyndina af borðinu.
„Ef það er barn þarna úti sem virkilega þarfnast mín og minnar hjálpar þá er ég viss um að ég muni enda á að ættleiða það.“
Ben hefur verið einhleypur síðan hann var 21 árs. Þrátt fyrir það finnur hann enga löngun til þess að leitast eftir sambandi þar sem fjölskyldan hans er það mikilvægasta í lífi hans.
„Ég hef aldrei leitast eftir sambandi þar sem ég er ánægður eins og er. Í hvert skipti sem ég hugsa um að vera í sambandi kemst ég alltaf að sömu niðurstöðunni, börnin eru ávallt í fyrsta sæti“
Ben Carpenter er afar ánægður með fjölskylduna sína og foreldrahlutverkið fer honum vel.
„Hver sem er getur verið faðir en það þarf einhvern sérstakan til að vera pabbi“