Samskiptaforritið Snapchat er greinilega til margra hluta nytsamlegt en því fékk tvítugur Bandaríkjamaður, Ethan að nafni, að kynnast á dögunum.
Forritið býður upp á allskonar skemmtilegar viðbætur, eða svokallaða filtera, sem hafa eflaust kitlað hláturtaugar margra. Þannig er hægt að láta forritið breyta útliti fólks þannig að til dæmis fullorðnir einstaklingar líta út eins og börn og karlar líta út eins og konur – og mikið meira til.
Það var einmitt seinni „filterinn“ sem Ethan notaði þegar hann ákvað að fara á stúfana og athuga hvort þarna úti leyndist einstaklingur – eða einstaklingar – sem freistuðu þess að komast í kynni við börn í kynferðislegum tilgangi.
Ethan tók mynd af sér, stofnaði aðgang á Tinder undir nafninu Esther og setti myndina svo á stefnumótaforritið.
Ekki leið á löngu þar til fullorðinn maður setti sig í samband við Esther. Eftir stutt samtal sagði Esther manninum að hún væri sextán ára og spurði hvort hann gerði athugasemdir við það. Í fyrstu sagði hann að aldurinn gæti „verið vandamál“ en eftir því sem lengra leið á samtalið virtist það ekki vera vandamál lengur.
Til að gera langa sögu stutta var maðurinn handtekinn þann 6. júní síðastliðinn, nokkrum dögum eftir að samskipti hans við Ethan hófust. Maðurinn sem um ræðir heitir Robert Davies en svo vill til að hann er lögreglumaður í Kaliforníu. Hann hefur nú verið sendur í launalaust leyfi meðan mál hans er til rannsóknar. Að sögn lögreglunnar í San Jose, þar sem Ethan er búsettur, skiptir raunverulegur aldur Ethans, eða „Esther“ ef út í það er farið, engu máli. Þarna hafi Robert talið sig vera að tala við barn undir lögaldri í kynferðislegum tilgangi og það sé lögbrot.
Ethan segir við bandaríska fjölmiðla að hann hafi ákveðið að prófa þetta í ljósi þess að góð vinkona hans hafi orðið fyrir kynferðisofbeldi í æsku. Hann hafi aldrei gert þetta áður og hann muni ekki endurtaka leikinn.