„Ef ekki væri fyrir þetta myndband þá væri dóttir mín ekki á lífi í dag,“ segir móðir ungrar stúlku sem veiktist hastarlega í nóvember 2014.
Móðirin, Jade Rodford, segir að dóttir hennar, Ella Erangey, hafi fengið hita og orðið verulega slöpp nokkru áður. Jade hætti að lítast á blikuna þegar öndun Ellu var orðin hröð og grunn og húðin upphleypt á stöku stað. Hún fór með stúlkuna til læknis sem taldi að Ella væri bara með flensu.
Þá greiningu fékk læknirinn meðal annars á þeim forsendum að Ella var ekki með nein útbrot þegar hún kom – þó þau hefðu sést augljóslega þegar hún var heima skömmu áður. Þá virtist öndunin eðlileg þegar Jade kom með hana.
Þegar heim var komið birtust útbrotin aftur og þá ákvað Jade að taka upp myndband á símann sinn. Næst þegar Jade fór með Ellu til læknis sýndi hún honum myndbandið og það var þá sem rétt greining fékkst: Ella var með blóðeitrun eða sýklasótt (e. sepsis) og þurfti nauðsynlega á lyfjameðferð að halda, ekki seinna en strax.
Það er skemmst frá því að segja að Ella lá inni á sjúkrahúsi í tólf daga eftir greininguna. Hún náði góðum bata og er í dag heilbrigð fimm ára stúlka. Jade segir það hefði getað farið illa ef ekki hefði verið fyrir þetta tiltekna myndband. Heilbrigðisstarfsmenn hafi ekki áttað sig á alvarleika málsins fyrr en þeir sáu það.
„Án myndbandsins var ég bara að koma með venjulegt barn með háan hita. En myndbandið sýndi hvað var í gangi. Þeir hefðu eflaust sent hana heim ef ég hefði ekki sýnt þeim það,“ segir hún við Mail Online.
Jade hvetur foreldra til að vera vakandi fyrir einkennum sem þessum hjá börnum sínum. Hún hafi ákveðið að birta myndbandið í þeim tilgangi að aðrir foreldrar verði ef til vill betur meðvitaðir um veikindi barna sinna og bregðist skjótt við ef minnsti grunur vaknar um alvarleg veikindi.
Í grein í Læknablaðinu kemur fram að sýklasótt sé alvarlegt heilkenni sem orsakast af almennu bólguviðbragði líkamans við alvarlegri sýkingu. Talið er að 44 þúsund manns deyi árlega af völdum sýklasóttar í Bretlandi á hverju ári.
