Opin færsla hinnar bandarísku Lauran Isringhausen á Facebook hefur vakið athygli fyrir að varpa góðu ljósi á ógnvekjandi aðstæður bandarískra kvenna. Í sumum fylkjum Bandaríkjanna hefur sjálfsákvörðunarréttur kvenna orðið fyrir grófum afskiptum löggjafans. Þungarrof hefur verið bannað eða gert háð mjög ströngum skilyrðum, og liggja hörð viðurlög við ólöglegu þungunarrofi. Þetta á sér stað í Bandaríkjunum á sama tíma og á Ísland hefur gert sjálfsákvörðunarrétt kvenna hærra undir höfði með því að heimila þungunarrof án skilyrða fram að 22 viku meðgöngu .
„Ég er búin að fá mig fullsadda af þessu landi. Nauðgun er ekki lengur nauðgun. Ég get ekki afturkallað samþykki mitt á meðan á samförum stendur. Ef mér verður nauðgað, verð ólétt í kjölfarið en ákveða að eiga barnið, þá getur nauðgari minn lögsótt mig til að fá umgengnisrétt við barnið. Ef ég fer í þungunarrof á ég það á hættu að enda í fangelsi sem morðingi. Ef hjá mér verður fósturlát og það mælist nikótín í blóði mínu þá olli ég þungunarrofi og fer í fangelsi fyrir morð. Ef ég ferðast til fylkis þar sem þungunarrof er löglegt en það kemst upp um það, þá fer ég í fangelsi fyrir morð. Ef ég fer í fangelsi fyrir þungunarrof þá er ég afbrotamaður og missi kosningarétt. En tryggingarnar mínar mega hafna því að niðurgreiða getnaðarvarnir fyrir mig, lyfjafræðingurinn minn neita að afgreiða lyfseðlana mína, læknirinn minn getur logið og neitað mér um þjónustu á grundvelli trúar sinnar. Ég hef minni réttindi en fóstur. Ef fóstur er kvenkyns þá nýtur það betri réttinda sem fóstur heldur en það mun njóta eftir að fæðast sem kona. Mig langar hreinlega að brenna þetta land eins og það leggur sig til grunna.“
Ofangreind lýsing minnir um margt á bókina Saga þernunnar eftir Margaret Atwood, sem vinsælir sjónvarpsþættir hafa verið gerðir eftir. Bókin lýsir framtíðarsamfélagi þar sem ófrjósemi hefur stofnað framtíð mannkyns í hættu. Eitt samfélag hefur gengið í þann vanda með því að loka sig af frá umheiminum, safna saman öllum frjóum konum, svipta þær réttindum og nýta til undaneldis. Á meðfylgjandi korti má sjá þau fylki Bandaríkjanna þar sem tekist hefur, eða reynt er að herða löggjöf um þungunarrof. Löggjöfin miðast jafnvel að því að banna þungunarrof með öllu.