Víetnamska fyrirsætan Ngoc Trinh gæti átt von á hárri sekt út af kjólnum sem hún valdi að vera í við frumsýningu myndarinnar A Hidden Life á Cannes-kvikmyndaverðlaunahátíðinni.
Víetnamski menningar-, íþrótta- og ferðamálaráðherrann, Nguyen Ngoc Thien, segir að kjóllinn hafi strítt gegn siðferði, móðgað og misboðið almenningi, og hefur óskað eftir formlegri rannsókn á því hvort kjóllinn hafi brotið siðferðislög í Víetnam, sem er afar ströng löggjöf og getur það varðað háum sektum að brjóta gegn þeim. Talsmaður ráðuneytisins sagði að kjóllinn hefði „strítt gegn víetnamskri hefð og fólk ætti hiklaust að gagnrýna svona siðlausa háttsemi.“
Ngoc kærir sig samt kollótta um gagnrýnina og sagði í samtali við Express að það væri ógerlegt að gera öllum til geðs, það sem skipti meginmáli var að henni leið vel í kjólnum.
„Mér hefur verið hrósað mikið fyrir fatavalið. Mér er sama þó fólk gagnrýni það því mér fannst ég falleg í kjólnum, sem kom vel út á rauða dreglinum í Cannes,“ sagði Ngog í samtali við Express.„Ég get ekki gert öllum til geðs.“