Hvað er það fyrsta sem þú gerir þegar þú vaknar? Teygirðu úr þér? Skoðarðu veðurappið? Skellir þér í sturtu? Ef þú vilt ná árangri í lífinu þá er í fínu lagi að gera eitthvað af þessu, svo lengi sem þú forðast eitt: Að skoða tölvupóstinn þinn.
Það getur verið freistandi að byrja daginn á að skoða tölvupóstinn. Hann er þarna í símanum þínum og þú heldur kannski að það sé svo árangursríkt að geta klárað að lesa nokkra tölvupósta snemma dags en það getur verið mjög slæmt.
Julie Morgenstern hefur verið ráðgjafi fyrirtækja á borð við American Express, FedEx og Microsoft síðan 1989 og hefur skrifað mikið um tímastjórnun fyrir Forbes og New York Times.
Í samtali við Huffington Post sagði Morgenstern að ef fólk byrjar daginn á að skoða tölvupóstinn þá nái það sér ekki þann daginn.
„Þessar óskir og þessar truflanir og þetta óvænta og þessar áminningar og vandamál eru endalaus … það er fátt sem getur ekki beðið í minnst 59 mínútur.“
Hún segir að vandinn við tölvupóstinn sé að það þarf að bregðast við honum.Þetta endar bara með að fólk hoppar úr einu verkefni í annað og lætur innhólfið stjórna dagskrá dagsins. Í staðinn fyrir að lesa tölvupóstinn ætti að byrja daginn á að ljúka við mikilvægt verkefni sem krefst einbeitingar.
Ef þú byrjar daginn á mikilvægu verkefni sem þarfnast einbeitingar þá kemurðu mun meiru í verk sagði Morgenstern og benti á að fólk sem hefur náð góðum árangri byrji daginn alltaf svona.
Auk þess eru líkur á að tölvupóstar sem þú færð á morgnana muni stressa þig og ekki koma þér í gott skap. Morguninn snýst um að gefa tóninn fyrir daginn og að lesa reiðilega tölvupósta frá yfirmanni þínum mun ekki gefa góðan tón.