Óhætt er að segja að Darian Depreta, móðir lítillar stúlku að nafni Bella, hafi brugðið þegar henni var litið upp í munn stúlkunnar á dögunum. Stór og dökkur blettur þakkti nær allan efri góm hennar og óttaðist Darian það versta.

„Ég fór með fingurinn upp í hana og strauk þetta til að athuga hvort þetta færi burt. Þegar það gerðist ekki hringdi ég í mömmu og bestu vinkonu mína til að spyrja ráða,“ segir hún í Facebook-færslu sem vakið hefur talsverða athygli.

Því næst hafði Darian samband við lækni og var sagt að koma undir eins. Hjúkrunarfræðingur sem skoðaði litlu stúlkuna renndi fingrinum yfir blettinn, en allt kom fyrir ekki. Læknirinn sem skoðaði hana velti fyrir sér hvort um fæðingarblett væri að ræða en Darian útilokaði það. Hún sagðist skoða upp í Bellu mjög reglulega og hún hefði tekið eftir blettinum ef hann hefði verið þarna.

Læknirinn sem skoðaði Bellu treysti sér ekki til að leggja mat á málið og vildi að Bella færi til sérfræðings. „Eftir að ég hafði fullyrt að þetta væri ekki fæðingarblettur þá ákvað læknirinn að renna fingrinum einu sinni enn yfir blettinn,“ segir hún og það var þá sem í ljós kom hvað þetta var.

„Ég segi að bletturinn virðist vera ljós í jaðrinum og það var þá sem læknirinn byrjar að kroppa þetta upp. Þá kom í ljós hvað þetta var. PAPPI SEM BELLA HAFÐI STUNGIÐ UPP Í SIG OG HAFÐI LÍMST VIÐ EFRI GÓMINN,“ skrifaði Darian í hástöfum.

Darian viðurkennir að hún hafi orðið nokkuð vandræðaleg. „Ég eiginlega hló og grét til skiptis í svona fimm mínútur,“ segir hún og bætir við að hún sé þakklát fyrir að þetta var ekki eitthvað verra eftir allt saman. Telur hún að þar sem Bella er að taka tennur hafi hún stungið pappanum upp í sig með fyrrgreindum afleiðingum.

Lærdómurinn af þessu er kannski sá að það alltaf betra að leita til læknis og fá álit hans ef áhyggjur koma upp. Jafnvel þó fórnarkostnaðurinn sé að verða skömmustulegur í smá stund.