Fjölmiðlakonan og rithöfundurinn Þorbjörg Marinósdóttir og unnusti hennar Baggalúturinn og fyrrverandi borgarfulltrúinn Karl Sigurðsson ætla að ganga í það heilaga á Ítalíu í september.
Þorbjörg, eða Tobba eins og hún er betur þekkt, og Karl hafa verið trúlofuð síðan desember 2016. Þá fór Karl á skeljarnar á tónleikum Baggalúts í Háskólabíói fyrir framan fullan sal af fólki.
Parið á saman tvær dætur, Regínu og Ronju Guðbjörgu.
DV heyrði í Tobbu og fékk að vita meira um brúðkaupið og undirbúninginn.
Brúðkaupið verður 19. september næstkomandi.
„Þetta verður lítið brúðkaup. Aðeins foreldrar, amma, systkin og nánustu vinir. Við vildum hafa þetta lítið og persónulegt og leigðum litla villu í Marché-héraði á Ítalíu. Þar verðum við í viku og eldbökum pítsu, sólum okkur, förum í heimatilbúið pub quiz og njótum þess að vera með fólkinu okkar,“ segir Tobba.
Undirbúningurinn fyrir brúðkaupið hefur verið mjög skemmtilegur að sögn Tobbu.
„Við fórum út síðasta sumar að skoða villuna, smakka matinn og heimsækja vínbóndann,“ segir Tobba.
„Eitt það skemmtilegasta hingað til var að máta brúðarkjóla með mömmu, ömmu og tengdó. Mig var búið að kvíða dálítið fyrir því af ýmsum ástæðum. Maður virðist jú aldrei vera ánægður með útlit sitt og svo er pressan að finna fullkomin kjól alltaf galin. Svo er þetta týpíska lögmál að þegar það á að versla sér eitthvað, þá finnst aldrei neitt. Ég bókaði mér mátun hjá Beggu Bridals sem var algjörlega stórkostleg upplifun. Freyðivín, konfekt og faglegar hendur. Búðinni var lokað á meðan og ég hreinlega sveif á bleiku skýi. Mér leið eins og Kardashian! Guðdómlegir kjólar. Nú er aðalmálið hvort ég eigi að vera með eitt aðaldress og annan partíkjól! Lúxus vandamál!“
Tobba gefur okkur smá vísbendingu um brúðarkjólinn: „Stefnan er tekin á antík bleikt og slör. Annað er leyndamál.“
Parið afþakkar gjafir. „Svo dýrt að ferðast. Mæting okkar nánasta er besta gjöfin,” segir Tobba.