Miklu algengara er að giftir karlar sem stíga hliðarspor haldi framhjá með ókunnugu fólki en konur sem halda framhjá. Hins vegar eru langalgengustu friðlar giftra kvenna úr vinahópi þeirra. Algengustu hjákonur kvæntra karla eru hins vegar vinnufélagar.
Þetta ásamt öðru fróðlegu er niðurstaða breskrar kynlífskönnunar með 1660 þátttakendum. Niðurstöður hennar eru birtar á vef Independent.
Hér að neðan má sjá mynd af niðurstöðunum. Ríflega helmingur kvenna sem höfðu haldið framhjá höfðu gert það með vini en 32% karla. Fjörutíu og fjögur prósent karlanna höfðu haldið fram hjá með vinnufélaga en 32% kvennanna. Tuttugu og sjö prósent karlanna höfðu átt skyndikynni með ókunnugum en 9% kvennanna. Þá höfðu 5% karlanna haldið framhjá með aðila af sama kyni en engin kvennanna í könnuninni.