Athafnakonan og fyrrverandi fegurðardrottningin Linda Pétursdóttir birtir fallegan pistil á Instagram þar sem hún lítur yfir farinn veg.
„Allt það erfiða sem ég hef gengið í gegnum, hvort sem það hafa verið slæm köst af liðagigt, fjárhagslegir eða tilfinningar erfiðleikar (svo vægt sé til orða tekið!), heimilisofbeldi eða áfallastreita sem ég hef glímt við, eða ástvinamissir, hefur verið sársaukafullt að komast yfir. En því sársaukafyllri sem lexían er því meira töfrandi hafa uppgötvanir mínar verið. Það eru klárlega ekki til neinar flýtileiðir en þegar ég hef komist yfir sársaukann þá byrjar heilunin og töfrarnir gerast,“ skrifar Linda.
Hún þakkar seiglunni fyrir að hafa komist í gegnum erfiðleika og segist vera þakklát fyrir margt í lífinu í dag.
„Ég stend keik eftir að hafa misst allt, þar sem ég var að klára gráðu í heimspeki, stjórnmálafræði og hagfræði og er búin að búa til gróskumikið fyrirtæki á netinu (og ég elska að vera komin aftur í atvinnurekstur að þjóna dömunum mínum!),“ skrifar hún og vísar eflaust í þann tíma þegar hún rak Baðhúsið, heilsuræktarstöð fyrir konur. „Ég er að lifa drauminn og ég trúi því að ég geti gert allt sem ég einset mér að gera.“
Linda verður fimmtug á árinu og er með sterk skilaboð til fylgjenda sinna á Instagram.
„Ekki draga úr draumunum svo þeir passi við líf þitt í dag. Gerið þá frekar stærri. Þetta er svo einfalt,“ skrifar Linda. „Munið að þið eruð aldrei of gömul og það er aldrei of seint.“