„Guð, ég veit ekki hvar ég á að byrja, en mig langar að opna umræðuna um sjúkdóminn Bulimia Nervosa á Íslandi.“
Á þessa leið hefst færsla glamúrfyrirsætunnar Öldu Guðrúnar Jónasdóttur, eða Öldu Coco, á Instagram. DV hafði samband við Öldu sem gaf góðfúslegt leyfi til að birta pistilinn enda segir hún ekki skammast sín fyrir að vera haldin búlimíu, eða lotugræðgi. „Þetta er bara sjúkdómur,“ segir hún í samtali við blaðamann.
Í færslunni á Instagram rekur hún það hvernig sjúkdómurinn hefur þróast síðustu tvö árin.
„Seinustu tvö ár hef ég troðið mat ofan í mig og neytt hann aftur upp úr mér með uppköstum. Stundum einu sinni á dag, stundum oftar. En af hverju? Ég var hrædd um að þyngjast og passa ekki í þessa svokölluðu staðallíkamsímynd. Ég hélt að ég myndi haldast jafn grönn svona og æfði ekki neitt á meðan og ef ég æfði átti ég ömurlegar æfingar,“ skrifar Alda. Hún segir að fyrir mánuði síðan hafi hún einfaldlega hugsað: Hingað og ekki lengra.
View this post on Instagram
„Ég hef aldrei verið með hægari brennslu en ég var með þá og aldrei eins lítið þol eins og þá og aldrei verið jafn óhamingjusöm og þá. Hvernig ég vaknaði upp úr þessum skelfilega sjúkdómi var að ég vil ekki ljótar tennur. Ég vil ekki bregðast sjálfri mér, fjölskyldunni minni, manninum mínum og dóttur minni. Ég vill lifa lífinu lifandi, hamingjusöm og með öllum þeim sem mér þykir vænt um. Ég vill aldrei þurfa að lenda á spítala með næringarskort eða næringu í æð,“ skrifar Alda og segir lífið allt annað síðasta mánuðinn.
„Núna nýt ég þess að borða góðan mat og hreyfa mig,“ segir hún. „Þessi sjúkdómur er ekki velkominn. Ég er svo ánægð og hamingjusöm í dag og líður eins og ég sé fyrst frjáls úr þessu andlega ömurlega fangelsi.“
Alda lítur framtíðina björtum augum og er sátt í eigin skinni í dag.
„Í dag tala ég ekki niður til mín. Ég er búin að finna sjálfa mig aftur. Sjálfsöryggið mitt sem ég alltaf hafði er komið aftur og mér finnst ég meira en nógu góð. Núna ætla ég að halda áfram að næra sálina mína líkaman minn og hugsa vel um sjálfa mig.“