Ashley Graham, ofurfyrirsæta og aktivisti fyrir líkamsvirðingu, birtir stórskemmtilegt myndband af sér í ræktinni á Instagram. Í myndbandinu sést Ashley gera grindarbotnsæfingu og svitna vel. Það sem er hins vegar aðhlátursefni hjá Ashley í myndbandinu er hve mikið brjóstin þvælast fyrir þegar að æfingin er gerð. Í hvert sinn sem Ashley lyftir upp mjöðmunum slást brjóstin nefnilega í andlit hennar.
„Þegar að brjóstin þín og hakan mætast. Mjög hversdagslegt,“ segir Ashley í myndbandinu, en þjálfari hennar, Kira Stokes, segir þetta vera eitthvað sem hún þurfi ekki að hafa áhyggjur af.
„En ég þarf þess!“ segir Ashley þá.
Í texta við myndbandið segir Ashley að hún leyfi brjóstunum ekki að stoppa sig á æfingu.
„Ég hef aldrei leyft líkama mínum að koma í veg fyrir æfingar og að æfa mikið. Brjóst, rass, magi – ekkert stoppar mig í því að hreyfa líkama minn og taka stjórn á heilsunni minni!“ skrifar Ashley.