Starfsmönnum á olíuborpalli var mjög brugðið þegar þeir sáu hund syndandi um í sjónum. Ekki síst fyrir þær sakir að olíuborpallurinn er staðsettur um 200 kílómetra frá ströndum Taílands og því er ekki beint daglegt brauð að hundur sjáist þar í sjónum.
Hundurinn var eðli málsins samkvæmt uppgefinn eftir volkið en ekki er vitað hvernig hann komst svona langt út á haf. Talið er að hundurinn hafi fallið frá borði báts sem var á svæðinu.
Starfsmenn olíuborpallsins hífðu hundinn upp úr sjónum og gáfu honum nafnið Boonrod sem þýðir: „Sá er lifði af.“
Hundurinn var ferjaður aftur til meginlandsins þar sem reynt verður að hafa uppi á eigandanum. Ef enginn gerir tilkall til hans þá mun meðlimur í fyrirtækinu sem sér um olíuborpallinn taka hann að sér.