Guðbjörg Hrefna er 26 ára gift tveggja barna móðir. Hún á tvær stelpur, Önju Mist, 4 ára, og Kristel Nótt, eins árs. Anja Mist er langveik en hún fæddist á 24 viku meðgöngu. Guðbjörg Hrefna segir frá reynslu sinni að eignast barn á 24 viku í einlægum pistli á Mæður.com, sem er í samstarfi við Bleikt.
Við gefum Guðbjörgu Hrefnu orðið þegar hún lýsir hvernig var að missa allt í einu allt legvatnið þegar hún var gengin 24 vikur á leið með sitt fyrsta barn:
„Mín fyrstu viðbrögð voru náttúrulega bara sturlun! Síminn minn [var batteríslaus] svo í geðshræringu minni vafði ég utan um mig loðnu teppi úr IKEA og hljóp fram á gang. Ég var náttúrulega allsber (ekki mitt stoltasta augnablik verð ég að viðurkenna) og bankaði á allar dyr, en ENGINN var heima í allri blokkinni!
Á leiðinni upp aftur heyrði ég að hurð opnaðist, þar var ungur strákur að koma heim sem bjó á móti okkur í stigaganginum. Honum var ansi brugðið, ég ásaka hann ekki haha. Hann leyfði mér að hringja hjá sér í sjúkrabíl og Einar.“
Eftir legvatnsstroku og sónar kom í ljós að allt legvatnið hafi farið. Guðbjörgu var tilkynnt að hún myndi eyða því sem eftir var af meðgöngunni á Landsspítalanum.
„[Ég fann fyrir] gífurlegri hræðslu, sorg og reiði. Þarna var ég 21 árs að ganga með mitt fyrsta barn svo ég var komin með ákveðnar hugmyndir hvernig meðganga gengi fyrir sig. Mitt viðmið voru mæður sem gengu fulla meðgöngu, svo það í rauninni hvarflaði ekki að mér að eitthvað svona myndi koma fyrir mig. Mér fannst þetta bara drullu ósanngjarnt. Mér leið eins og ég hefði brugðist henni. Eftir mikinn grátur náðu ljósmæðurnar, Einar og mamma að róa mig niður.“
Á fjórða degi var Guðbjörg komin með meðgöngueitrun og var sett af stað.
„Í byrjun var mér sagt að ef hún kæmi sama dag og ég missti vatnið og ég ekki búin að fá sterana fyrir lungun hennar voru um 50 prósent líkur á að Anja mín mynd lifa þetta af! En þar sem að ég náði fyrstu tveimur sterasprautunum voru líkurnar meiri heldur en minni sem róaði mig verulega.“
Hægt er að lesa allan pistillinn í heild sinni á Mæður.com með því að ýta hér.