Við höfum flestar vaknað og séð svartan koddann og áttað okkur á því að við höfum gleymt að taka af okkur maskarann kvöldið áður. En eftir að heyra sögu Theresu Lynch þá áttu aldrei eftir að gleyma því aftur. Við vörum við myndunum í greininni.
Theresa Lynch fór til læknis því augnlok hennar voru þung og bólgin. Hún fann fyrir miklum óþægindum og sársauka. The Sun greinir frá.
Theresa, 51 árs, var vön að taka aldrei af sér maskarann áður en hún fór að sofa í 25 ár. Litlar svartar kúlur mynduðust undir augnlokinu hennar og varð hún næstum blind.
Tveggja barna móðirin frá Ástralíu var hissa þegar læknar komust að því að hún væri með þessar kúlur undir augnlokinu, eða samvöxt (e. concretions) eins og það er einnig kallað.
Það þurfti 90 mínútna aðgerð til að fjarlæga samvöxtinn. Theresa ákvað að deila myndunum af auganu hennar til að vara aðra við hættunni sem fylgir því að sleppa því að taka maskarann af fyrir svefni.
„Þetta var svo óþægilegt. Augnlokin mín voru bólgin og þung því ég þreif ekki maskarann í svo langan tíma. Þegar Dr. Robaei kíkti undir augnlokin mín sagði hún: „Guð minn góður, ég hef aldrei séð svona á öllum ferli mínum,“ segir Theresa.
„Ég var með þann slæma vana að nota mikið af snyrtivörum og ekki þrífa þær af. Ég hefði aldrei átt að leyfa þessu að ganga svona langt.“
Augnlok Theresu eru varanlega skemmd og yfirborð hornhimnu hennar. Hún er heppin að hafa haldið sjóninni.