Milk Dornbierer, þrjátíu ára, flutti frá heimalandinu Ástralíu til Suður-London fyrir fimm árum síðan. Hún fékk draumastarfið og dýfði sér rakleiðis í næturlífið. Í kjölfarið þyngdist hún mikið. Hún var einhleyp á þessum tíma, borðaði skyndibita og drakk áfengi flest kvöld.
Í viðtali við Daily Mail segist hún aldrei hafa borðað salöt en að hún hafi drukkið mikið magn af orkudrykkjum yfir daginn. Áður en hún vissi af var hún búin að þyngjast um tuttugu kíló og var komin í stærð 14. Hún varð sífellt óöruggari eftir því sem aukakílóunum fjölgaði.
„Ég fékk mér beikonrúllu eða enskan morgunmat á morgnana. Ég fékk mér aldrei salat í hádegismat því ég hélt að ég yrði ekki södd eða að það gæfi mér ekki næga orku,“ segir Milk. „Ég var alltaf á ferðinni þannig að hádegismatur var eitthvað fljótlegt eins og KFC eða hádegistilboð og kvöldmatur væri pasta, pítsa eða hamborgari. Ég drakk líka orkudrykki allan daginn, alla daga.“
Matarvenjurnar versnuðu á kvöldin.
„Ég fór reglulega á Flat Iron, steikarstað í Covent Garden. Það er ekki hægt að bóka borð þar og það var oft tveggja klukkustunda bið þannig að vinir mínir og ég biðum á barnum og fengum okkur fullt af drykkjum til að drepa tímann,“ segir hún. „Drykkir eftir vinnu eru vinsælir í London en í Ástralíu eru hópíþróttir vinsælar.“
Eitt kvöldið þegar Milk var úti á lífinu varð hún afar óörugg og ákvað að breyta til. Mánudaginn eftir þá helgi skráði hún sig í átta vikna áskorun. Áskorunin fólst í því að breyta mataræðinu og að hún þurfti að mæta í ræktina fjórum til fimm sinnum í viku. Hún féll fyrir hreyfingunni og getur nú ekki hætt að hreyfa sig.
„Ég fer sex sinnum í viku og ef ég þarf að ferðast vegna vinnunnar reyni ég að finna líkamsrækt nálægt mér,“ segir hún. Eftir fyrstu fjórar vikurnar í áskoruninni var hún búin að léttast um þrettán kíló. Sex mánuðum síðan voru öll tuttugu kílóin sem hún hafði bætt á sig farin. Þessi partístelpa, sem gat ekki hlaupið lengra en fimm kílómetra snemma á þrítugsaldrinum, lauk nýverið við tíu kílómetra hlaup og ætlar sér að hlaupa hálfmaraþon í nánustu framtíð.