Sigtryggur Magnason skáld og Svandís Dóra Einarsdóttir leikkona eiga von á barni í lok sumars. Þetta kemur fram á Facebook-síðu Sigtryggs þar sem hann deilir mynd af eiginkonu sinni við Þjórsárdal, en þau skötuhjú eiga von á dreng.
„Það er óhætt að segja að við hlökkum mjög mikið til að kynnast þessum fjörkálfi!“ segir Sigtryggur.
Þau Sigtryggur og Svandís Dóra hafa verið saman um nokkurt skeið og giftu sig árið 2015. Þetta verður fyrsta barn þeirra beggja.
Sigtryggur er vel þekktur í auglýsingabransanum en hann hefur starfað í honum síðan 2005. Hann á að baki feril í blaðamennsku sem ritstjóri Dægurmálaútvarps Rásar 2, umsjónarmaður Helgarblaðs DV, ritstjóri Sirkuss Reykjavík og fastur pistlahöfundur hjá Morgunblaðinu. Þá var hann aðstoðarmaður mennta- og menningarmálaráðherra frá 2009-2010. Sigtryggur hefur einnig fengist við ritstörf og hafa leikverk hans verið sett upp hér á landi og víðar.
Svandís Dóra hefur leikið í sjónvarpsþáttunum Rétti, Pressu og Ástríði, kvikmyndunum Kurteisu fólki, Borgríki og fór með hlutverk Díönu Klein í kvikmyndinni um Harrý og Heimi. Hún fór með eitt af aðalhlutverkunum í kvikmyndinni Fyrir framan annað fólk í leikstjórn Óskars Jónassonar og sjónvarpsþáttaröðinni Borgarstjórinn, hugarfóstri Jóns Gnarr.
Bleikt óskar parinu innilega til hamingju.